«Ливерпуль» клуби мавсумдаги илк мағлубиятини тан олди

Англия чемпионатининг 21-туридан ўрин олган «Манчестер Сити» – «Ливерпуль» учрашуви ўз ниҳоясига етди. «Этихад Стэдиум»да бўлиб ўтган баҳсда мезбонларнинг қўли баланд келди.

Учрашув тенг курашлар остида бошланди, тўп назорати кутилганидек майдон эгаларида бўлган бўлса, мерсисайдлар ўзларининг хавфли юришлари билан ажралиб туришди.

Бироқ ҳисоб 40-дақиқага келибгина очилди, чап қанотда фаоллик кўрсатган Бернарду Силва тўпни марказдаги Серхио Агуэрога узатди, аргентиналик футболчи эса дарвозанинг юқори бурчагини аниқ нишонга олди.

Иккинчи бўлим ҳам икки томон фаоллигида бошланди. Меҳмонларнинг 64-дақиқадаги узоқ давом этган ҳужумларини Роберто Фирмино гол билан якунлади.

Аммо орадан узоқ вақт ўтмай мезбонлар яна ҳисобда олдинга ўтиб олишди. Дарвозабон бошлаб берган қарши ҳужумга Лерой Сане ўзининг аниқ зарбаси билан нуқта қўйди. Ўйин якунига қадар икки жамоада ҳам бир қатор имкониятлар юзага келди, бироқ уларни голга айлантириш футболчиларга насиб этмади.

Шу тариқа, Юрген Клопп шогирдлари ушбу мавсумдаги илк мағлубиятларини тан олишди. «Сити» эса очколарини 50тага етказиб олган ҳолда иккинчи ўринга қайтди ва «Ливерпуль» (54) билан орадаги фарқни тўрт очкогача қисқартирди.

АПЛ, 21-тур
Манчестер Сити – Ливерпуль 2:1 (1:0, 1:1)
Голлар: 1:0 – 40 Агуэро, 1:1 – 64 Фирмино, 2:1 – 72 Сане.

Манчестер Сити – Эдерсон, Компани (Отаменди, 88), Данило, Стоунз, Лапорт (Уокер, 86), Сильва (Гюндоган, 65), Фернандиньо, Стерлинг, Бернарду Силва, Сане, Агуэро.
Ливерпуль – Алиссон, Ловрен, Робертсон, Александер-Арнолд, ван Дейк, Вейналдум (Старридж, 86), Хендерсон, Милнер (Фабиньо, 57), Мане (Шакири, 77), Салах, Фирмино.
Огоҳлантиришлар: Ловрен (20), Компани (31), Вейналдум (38), Лапорт (45), Бернарду Силва (89), Эдерсон (90+5).

Манба: www.uff.uz

Янгиликлар