Жастин Гэтжи Ҳабиб Нурмагомедовни мағлуб этиш йўлларини маълум қилди

^{Фото: UFC}
Енгил вазн тоифасида UFC’нинг вақтинчалик чемпиони Жастин Гэтжи чемпион Ҳабиб Нурмагомедовга қарши эҳтимолий бўлажак жанг ҳақида фикр билдирди.

«Ҳабибга қарши жангда ҳал қилувчи жиҳат жойни тўғри танлашимда бўлади. Тўрдан узоқроқ юришим жуда муҳим. Агар Ҳабиб октагон ўртасида оёғингга етиб борса, у тейкдаунни якунлаш учун сени тўрга олиб боришга ҳаракат қилади. У бу усулни очиқ ҳудудда якунламайди.

Болдирга йўналтирадиган зарбаларим рақиб учун жуда ёқимсиз. Мен энди тиззадан юқорисига тепмайман. Бу усул масофани сақлашда анча хавфсиз ҳисобланади.

Ҳабибга тўрт марта тегинаман ва у қийин ҳолатда қолади. У оёққа етиб келиши мумкин, бироқ нима бўлган тақдирда ҳам унга мени ортимдаги тўр керак бўлади. Агар яқин атрофда тўр бўлмаса, унда муаммо пайдо бўлади. У марказдаги партер ҳолатида мени бир неча бор айлантириши мумкин, бироқ ҳаммасини якунлаш учун мени тўр яқинига олиб боришга интилади», — дейди Гэтжи.

Эслатиб ўтамиз, Жастин Гэтжи UFC 249 мусобақасида Тони Фергюсонни мағлуб этган ҳолда енгил вазн тоифаси вақтинчалик чемпионлигини қўлга киритди. Ҳабиб ва Гэтжи ўртасидаги жанг сентябрь ойида бўлиб ўтиши тахмин қилинмоқда. “Замин” янгиликларини “Инстаграм”да кузатиб боринг