Бруну Фернандеш — жаҳон футболининг навбатдаги юлдузи. Нега?

^{Фото: Goal}
Англия Премьер Лигасини мунтазам кузатиб борадиган мутахассис ва мухлисларни «Манчестер Юнайтед» 2020 йил январида келиб қўшилган португалиялик ҳужумкор ярим ҳимоячи Бруну Фернандешнинг ўйинлари ҳайратда қолдирди.

Дарҳақиқат, у жамоада пайдо бўлиши билан, жамоа дарҳол кетма-кет ўйинларда ғалаба қозона бошлади. Бруну «қизил иблислар»нинг ўйинига ўзгача бир гўзаллик ва нафислик олиб кирди. У майдонда бирданига бир нечта вазифани бажаради — ҳимояда ҳам, ҳужумда ҳам бирдек фойдали ўйинчи.

Айнан Бруну Фернандеш келажакда (Месси ва Роналду эрасидан кейин) жаҳон футболи юлдузига айланиши мумкин. Табиийки, кўпчиликда нега деган савол туғилиши мумкин. Хўш, у нимаси билан бошқалардан устун? Қуйида унинг ҳақиқатан ҳам жаҳон футболи юлдузи бўлиши мумкинлигини тасдиқловчи бир нечта далиллар келтирилади.

Доимий равишда югуриши
Бруну ҳеч қачон бир жойда турмайди, у ақл бовар қилмас даражада чидамли футболчи. У доимий равишда шерикларидан тўпни сўрайди, бўш зоналарга очилади рақибдан тўпни олиб қўяди ва ҳоказо. У тўпсиз ҳаракат қилиш борасида исталган футболчига дарс бера олади. У майдоннинг ҳар бир қаричи учун курашади. Таянч ярим ҳимоячиси вазифасини бажарган ҳолда, ҳимояда ҳам ёрдам беради, баъзида эса иккинчи ҳужумчи ролини бажариши ҳам мумкин. Замонавий футболда бу жуда муҳим маҳорат ҳисобланади. Тезкор ва шиддатли футболда аниқ зарбалар ва тезлик билан қарор қабул қилиш муҳим аҳамият касб этади. Бруну Фернандешда эса бу борада муаммолар йўқ.

Тактик жиҳатдан тўғри ўйинчилиги
Бу йигитчанинг тактикаси юқори даражада. Буни пайқаш учун унинг ўйинларини кузатишнинг ўзи кифоя. У бутун майдонни ҳамда ўйинни назорат қилади. Бруну тўп унга келгунига қадар нима қилишини олдиндан аниқлаб олади. Унинг ҳар бир тўп узатиши ва ҳаракати чуқур тактик аҳамиятга эга. Баъзан Бруну биргина узатмаси билан рақибнинг бир нечта чизиқларини кесиб ташлашга қодир. У — жудаям ақлли ўйинчи. Бруну ҳар бир жамоанинг асосий ўйинчиси бўла олади. Бундай ўйинчи ҳар бир жамоага керак!

Техникаси
Унинг техник қобилиятлари ҳақида ҳам фақат яхши гапларни айтиш мумкин. Бруну тўпни қабул қилганида, уни танаси ёрдамида рақибдан ёпади ва бутунлай бошқа томонга узатади. Португалиялик истеъдодли футболчи тезликда бир вақтнинг ўзида бир нечта рақиб жамоа ўйинчиларини алдаб ўтиши мумкин. Унинг зарбалари ҳам алоҳида эътибор қаратишга лойиқ — улар деярли ҳар доим аниқ ва кучли, бу эса рақиб жамоа дарвозабонлари учун қийинчиликларни туғдиради.

Ёши
Ҳозир у атиги 25 ёшда (1994 йилда туғилган). Шунга қарамай, «Удинезе», «Сампдория», «Спортинг» каби клубларда ҳаракат қилишга улгурган. Энди эса у «Манчестер Юнайтед»да. Бутун фаолияти давомида 288 та учрашув ўтказган ва 60 марта рақиблар дарвозасини ишғол қилган. У яна 8-9 йил бемалол юқори даражада ўйнай олади.

Ҳали Бруну Фернандеш ўзининг энг ёрқин ўйинларини кўрсатганича йўқ. Шундай экан, агар бор куч-қувватини сарфласа, жароҳатлар ва бошқа ҳолатлар халақит бермаса, у албатта, жаҳон футболи юлдузига айланишга мумкин. Бруну ҳар қандай нуфузли клубнинг юлдузига айлана олади. У марказий ўйинчи — жамоанинг мияси бўлиб, бутун ўйинни ўз назоратида ушлаб туради. “Замин” янгиликларини “Одноклассники”да кузатиб боринг