Одил Аҳмедов ЖЧ-2022 саралаш баҳсларида қайси жиҳатга эътибор қаратиш кераклигини айтди

Айни пайтда қовурғасидаги жароҳатини даволаб, Ўзбекистонда тикланиш жараёнини ўтказаётган миллий терма жамоа ва Хитойнинг "Цанчжоу Майти Лайонс" клуби ярим ҳимоячиси Одил Аҳмедов ЎФА матбуот хизматига интервью берди.

Унда сардоримиз Саудия Арабистонида ташкил этилаётган ЖЧ-2022 саралаш баҳслари иссиқда ўтказилишига муносабат билдирди. Футболчи бу борада руҳият катта рол ўйнашини билдирди.

- Араб давлатларида иссиқда ўйнаш жуда қийин. Авваллари ёзда у ерларда тўп тепганмиз. Иссиқда футболнинг жозибаси йўқолади. Лекин бу биз учун баҳона ёки муаммо бўлиши керак эмас. Чунки шундай шароитда рақиблар ҳам ўйнайди. Бу жойда ҳар тарафлама тайёр туриш керак. Айниқса, руҳий томондан. Шуларга эътибор қаратсак, ўйлайманки, биз учун муаммо бўлмайди.

Одам организмини мия назорат қилади. Иссиқда тўп тепиб бўлмайди, деб мияга топшириқ берсангиз бўлди, оёқ ҳам югурмайди. Шу боис бу жойда психология катта рол ўйнайди, - деди Одил Аҳмедов.