21:44 / 03.03.2022

Шуҳрат Мақсудов: "Ёш футболчиларга икки ой давомида ҳеч кимдан кам эмасликларини уқтирдим"

^{Фото: championat.asia}
Суперлиганинг 1-туридан ўрин олган "Бунёдкор" - "Сўғдиёна" (0:0) учрашувидан сўнг мезбонлар бош мураббийи Шуҳрат Мақсудов матбуот анжуманида қатнашди.

"Авваламбор, футбол мухлисларини 2022 йилги мавсум бошлангани билан табриклайман. Опа-сингил ва оналаримизни байрамлари билан қутлайман. Бугун қийин ўйин бўлиши аниқ эди. Ҳар ҳолда чемпионатнинг илк ўйини. "Сўғдиёна"ни қандай жамоа эканлигини биламиз. Мухлисларга ўйин ёқди деб ўйлайман. Фурсатдан фойдаланиб, футболчиларимга борини бериб ўйнаганликлари учун яна бир бор раҳмат", – деди Шуҳрат Мақсудов.

- Жаҳонгир Ўрозов, Маҳмуд Маҳаммаджонов яхши таассурот қолдиришди. Лекин якуний кескин пасни беришда кўп хатоларга йўл қўйишди. Буни нима билан изоҳлайсиз?
- Бу футболчилар Суперлигада дебют қилишди. Ҳаяжон бўлиши оддий ҳол. Футболчилар билан икки ой ичида ўзига ишонишларини, ҳеч кимдан кам эмасликларини қулоқларига қуйдим. Ҳомийимиз Туркияда йиғин ўтказишга ёрдам берди. Хориж йиғинида ёшлар ўзларига ишонч олишди. Улар терма жамоаларда ҳам ўзларини кўрсатишади. Тайёр футболчи олишдан кўра академияга мурожаат қилишни лозим топдик.

- Ўз вақтида ҳужумчи бўлгансиз. Нима учундир ҳозир ҳужумчиларга тажоввузкорлик етишмаётгандек...
- Нафақат "Бунёдкор"да, бошқа жамоаларда ҳужумчилар билан боғлиқ муаммолар бўляпти. Изланишда давом этамиз.

- "Бунёдкор" жамоасининг асосини ёш футболчилар ташкил қилмоқда. Ёш жамоаларда битта муаммо кузатилади – беқарорсизлик. Мазкур муаммони қандай ечмоқчисиз?
- Тўғри таъкидладингиз. Футбол ичидаги инсонлигингиз сезилди. Биз ҳам буни биляпмиз. Ёш футболчиларда беқарорлик бўлиши табиий. Вақт ўтгани сари ўз йўлига тушади. Катта жамоаларда ҳам барқарорлик етишмайди.

- Иброҳим Томива қишки ўқув-машғулот йиғинларининг катта қисмини асосий жамоа билан ўтказмади. Бугун асосий таркибга туширишдан аввал бу ҳолат сизни ташвишлантирмадими?
- Гарчи биз билан бирга хориж йиғинида қатнаша олмаган бўлса-да, ўринбосарлар сафида мунтазам ўйин амалиётига эга бўлди. Спорт формаси яхшилиги кўринди. Туркиядалигимизда ҳам Томива билан алоқада бўлиб турдик.