Google кино ва сериаллар оламига кириб келмоқда: компания 100 Zeros лойиҳасини бошлади

Дунёдаги энг йирик технология компанияларидан бири ҳисобланган Google кино ва сериаллар ишлаб чиқариш бўйича йирик лойиҳани амалга оширишни бошлади. Business Insider нашри тарқатган маълумотларга кўра, Google 100 Zeros номли янги лойиҳасини ишга туширган. Ушбу янги бўлинма Range Media Partners продюсерлик компанияси билан ҳамкорликда ишлайди ва компания томонидан молиялаштирилиши мумкин бўлган янги, истиқболли ва инновацион кино ҳамда телешоу лойиҳаларини излаш билан шуғулланади.

Google ушбу ташаббус орқали ўзининг янги хизматлари, айниқса, сунъий интеллект технологиялари ва Android платформасига бўлган қизиқишни оширишни режалаштирмоқда. Маълум қилинишича, янги лойиҳада иштирок этадиган фильмлар ва сериаллардаги асосий қаҳрамонлар, албатта, Android операцион тизимидаги смартфонлардан фойдаланишлари мумкин. Аммо бу интеграция сунъий ва мажбурий кўринмаслиги кераклигига алоҳида эътибор қаратилган.

100 Zeros'нинг илк лойиҳаси сифатида «Какку» деб номланган қўрқинчли фильм тақдим этилган ва бу фильм 2024 йилнинг бошларидаёқ оммага намойиш этилган. Ушбу фильмнинг бошланиш титрларида Google’нинг янги ташаббуси — 100 Zeros логотипини ҳам кўриш мумкин.

Шу билан бирга, Google ўзининг энг йирик платформаларидан бири ҳисобланган YouTube'ни янги кино ва сериаллар учун тарқатувчи сифатида кўриб чиқмаяпти. Бу эса компания томонидан алоҳида кинематография йўналишидаги платформалар билан ҳамкорлик қилиши мумкинлигини англатади.

Айтиш жоизки, Google ҳозирча 100 Zeros ташаббусини расман тақдим этмаган ва оммавий ахборот воситалари орқали тарқалган бу маълумотларга изоҳ беришдан бош тортган.

Экспертларнинг фикрича, Google’нинг бу йўналишдаги янги қадами кино ва сериаллар бозорида йирик рақобатни келтириб чиқариши мумкин. Айниқса, Amazon ва Apple каби йирик компаниялар аллақачон ўзларининг кино ва сериал студиялари билан бу бозорга жиддий кириб келган. Google эса янги лойиҳаси билан ушбу соҳада ўзига хос йўналиш яратиш ва кино саноатида инновацион ғояларни ривожлантиришни кўзламоқда.

Google’нинг бу ташаббуси омма томонидан қандай қабул қилинишини ва кино индустриясида қандай натижаларга эришишини вақт кўрсатади. Аммо бир нарса аниқ: технология гиганти ўз фаолияти доирасини кенгайтириш орқали нафақат бизнес манфаатларини, балки замонавий кино ва сериаллар ишлаб чиқариш стандартларини ҳам ўзгартиришни мақсад қилган. «Замин»ни Telegram’да ўқинг!