Apple 2027 йилда: шиша iPhone, ақлли кўзойнак ва Siri’нинг энг зўр шакли кутиляпти

2027 йил Apple учун шунчаки юбилей эмас — янги технологик давр бошланиши мумкин. Мана шундай шов-шувли маълумот билан Bloomberg таҳлилчиси ва инсайдер Марк Гурман чиқиш қилди. Унинг таъкидлашича, Apple ўзининг севимли қурилмаси – iPhone’нинг 20 йиллиги муносабати билан бутун экотизимни қайта яратишга тайёрланмоқда.

iPhone – шиша ва “узлуксиз” дизайн билан

Энг катта янгиликлардан бири — рамкасиз ва тўлиқ шишадан ясаладиган, буклама шаклдаги iPhone бўлиши мумкин. Гурманнинг ёзишича, бу қурилма Apple’нинг 2019 йилдаги патентларига асосланган бўлиб, тана атрофини бирлаштирувчи “айлана каби” корпусга эга бўлади.

Бу Apple тарихидаги энг футуристик iPhone бўлиши мумкин. Илгари The Information манбаси компания экран остида камерали iPhone устида ҳам иш олиб бораётганини хабар қилган эди. Шунингдек, The Elec маълумотига кўра, Apple бундай қурилмада Samsung ёки Vivo’нинг эгри ёқали дисплейларини эмас, балки ўз технологиясини танламоқда.

Қўшимча қурилмалар: ақлли кўзойнак ва камерали соат

Юбилей смартфонидан ташқари, 2027 йилда Apple яна бир қатор инновацион гаджетларни тақдим этиши мумкин:

• Ақлли кўзойнаклар — камера, микрофон, динамиклар ва СИ ёрдамчиси билан жиҳозланади;
  
• AirPods’нинг янги авлоди — визуал таржима ва бошқарувга эга бўлиши мумкин;
  
• Камерали Apple Watch — тиббий таҳлиллар ва СИ имкониятларини кенгайтириш мақсадида;
  
• Буклама iPhone — дисплейи икки ёки уч қисмига ёйилиши мумкин бўлган модел.
  

Siri ва СИ: Apple ўз сервер чипини ҳам тайёрламоқда

Apple ўзининг овозли ёрдамчиси Siri’ни сунъий интеллект асосида тубдан қайта ишламоқда. 2027 йилда компания Siri’ни катта тилли модел (LLM) ёрдамида интеллектуал ёрдамчига айлантиришни режалаштирган. У фақатгина савол-жавоб билан чекланмайди — балки мулоқотчига айланади.

Шунингдек, Apple ўз СИ сервиси учун сервер даражасидаги махсус чипларни яратиш устида ҳам иш олиб бормоқда. Бу ўз экотизимида автоном ва хавфсиз СИни таъминлаш имконини беради.

Яна бир шов-шувли лойиҳа: Appleнинг "қўлли робот ёрдамчиси"

Энг катта кутилмалардан бири – Apple’нинг уй учун мўлжалланган иш столига қўйиладиган “қўлли” робот ёрдамчиси бўлиши мумкин. Бу робот кундалик вазифаларни бажариш, овозли ёки ишоралар асосида жавоб бериш қобилиятига эга бўлиши кутилмоқда.

Zamin.uz таҳририяти Apple томонидан режалаштирилаётган ушбу технологик янги даврни ҳаяжон билан кузатмоқда. Агар ушбу режалар амалга ошса, 2027 йил нафақат Apple, балки бутун технология саноати учун бурилиш нуқтасига айланиши мумкин. Бошқа янгиликлар учун биз билан қолинг! «Замин»ни Telegram’да ўқинг!