Apple 2027да шиша ва рамкасиз iPhone тақдим этмоқчи!

Технология оламининг етакчи компанияси Apple яна бир инқилобий янгиликка тайёрланмоқда. Унга яқин манбаларнинг хабар беришича, компания 2027 йилда iPhone туркумининг 20 йиллиги муносабати билан тубдан янгиланган, рамкасиз ва тўлиқ шишадан ясалган смартфонни намойиш этишни режалаштирмоқда.

MacRumors сайти тарқатган маълумотларга кўра, Apple ҳозирда янги авлод iPhone моделлари устида фаол иш олиб бормоқда. Bloomberg мухбири Марк Гурманнинг таъкидлашича, юбилей моделида экрандаги кесиклар бутунлай йўқолади, Dynamic Island бўлими ҳам анча қисқартирилади. Бу Apple учун ҳақиқий рамкасиз дизайн йўлидаги катта қадам бўлиши кутилмоқда.

Юбилей флагманида ҳам экран, ҳам корпус шишадан иборат бўлади. Эгри ва юмалоқ қиррали, ультра-ингичка рамкалар билан жиҳозланган ушбу смартфон Apple тарихидаги эстетик жиҳатдан энг мукаммал гаджет сифатида баҳоланиши мумкин.

Аввалроқ The Information нашри 2026 йилда чиқиши кутилган iPhone 18 Pro моделларида экран остига жойлаштирилган Face ID технологияси ишлатилади деб хабар қилган эди. Лекин Гурманнинг ёзишича, компания бу концепциядан воз кечиб, Dynamic Island ни қисқартириш орқали экрандаги бўшлиқларни бартараф этишни мақсад қилмоқда.

Маълумки, Apple ҳар бир юбилейни инновацион қурилма билан нишонлаш анъанасини шакллантирган. Эслатиб ўтамиз, 2017 йилда компания 10 йилликни Face ID ва экран “қош”га эга бўлган iPhone X билан нишонлаганди. 2027 йилдаги 20 йиллик учун эса, янада даҳшатли дизайн янгилиги кўзланмоқда.

Bloomberg маълумотига кўра, ушбу модел учун илк бор Apple’нинг собиқ бош дизайнери Жонатан Айв илҳом берган. У ўз вақтида Apple учун тўлиқ шиша, ягона блокдан иборат смартфон концепциясини таклиф қилган ва бу орзуси энди амалга ошиши мумкин.

Шу билан бирга, мутахассислар бундай гаджет юпқалиги ва шиша материаллар сабабли айрим фойдаланувчиларда эҳтиётсизлик туйғусини уйғотиши мумкинлигини таъкидлашмоқда. Бироқ Apple ўзининг эстетик қарашлари ва оригинал дизайн тамойилларидан қайтишни режалаштирмаяпти.

2027 йилда намойиш этилиши кутилган бу рамкасиз ва шишадан иборат iPhone нафақат технология, балки санъат ва дизайн йўналишида ҳам янги босқични бошлаб бериши мумкин. Apple яна бир бор дунё миқёсида илғорликка даъво қилмоқда. «Замин»ни Telegram’да ўқинг!