Финляндиянинг машҳур Nokia компанияси яна мобил қурилмалар оламига фаол қадам ташлаш ниятида эканини эълон қилди, деб хабар берди kommersant.ru. Бу сафар компания янги ва кучли ҳамкор билан бирга ўз бренди остида замонавий смартфонлар ва бошқа мобил технологиялар ишлаб чиқариш ва сотиш режасини кўзламоқда.
Reddit платформасидаги расмий саҳифада берилган маълумотга кўра, Nokia ҳозирда ўз бренди остида мобил қурилмаларни биргаликда ишлаб чиқарадиган ва бозорга чиқарадиган катта ишлаб чиқарувчи-ҳамкорни излаётгани ҳақида очиқ маълум қилган. Яъни, фин компанияси бозорда яна ўз ўрнини тиклаш ва рақобатга тайёрланиш учун янги шерик топишга жиддий ёндашмоқда.
Охирги йилларда Nokia смартфонлари ва тугмачали телефонлари асосан HMD Global компанияси лицензияси орқали сотилиб келаётган эди. Бу шартнома 2026 йилда тугайди ва Android Authority маълумотларига кўра, келишувнинг узайтирилиши жуда шубҳали. Чунки HMD компанияси аллақачон ўз бренди остидаги янги қурилмаларни фаол тарғиб қилмоқда. Бу эса Nokia билан ўзаро ҳамкорлик босқичма-босқич тўхташига ишора беради.
Бозор таҳлилчилари таъкидлашича, Nokia бренди ҳозирги ёшлар орасида аввалги йилларга нисбатан анча кам таниладиган ва бозордаги рақобат кучайган даврда компанияга катта синовлар кутмоқда. Финляндиялик ишлаб чиқарувчи глобал смартфон бозорида эски нуфузини қайта тиклаш учун инновацион технологияларга ва кучли шерикка муҳтож бўлади. Агар бу таклиф амалга ошмаса, Nokia'нинг бозорга қайтиши фақат номигагина айланиб қолиши хавфи бор.
Технология дунёсини кузатиб бораётган барча мухлислар бу янгиликни катта қизиқиш билан қабул қилмоқда. Энди барча савол — Nokia'нинг янги йўналишдаги ҳамкори ким бўлади ва бу бренд яна мобил дунёдаги ўз нуфузини қайта тиклай оладими?
«Замин»ни Telegram’да ўқинг!
