Apple келаси чоракда 1,1 млрд долларлик бож тўлайди

Apple компанияси 2025 йилнинг кейинги чорагида тариф тўловлари туфайли 1,1 миллиард доллар (14,3 трлн сўм) харажатга дуч келиши кутилмоқда, деб TechCrunch.com хабар берди.

Бу йирик миқдордаги харажат асосан АҚШ ва Хитой ўртасидаги савдо тортишувлари ҳамда импорт маҳсулотларга жорий этилган янги тарифлар билан боғлиқ.

Apple маълум қилишича, айрим қурилмалар ва қисмлар Хитойда ишлаб чиқарилгани учун уларга юқори бож тўловлари қўлланилади. Компания буни ўз даромадига жиддий таъсир кўрсатадиган омил сифатида кўрмоқда.

Шу сабабли, Apple ишлаб чиқариш занжирини бошқа давлатларга ўтказиш имкониятларини кўриб чиқмоқда. Вьетнам ва Ҳиндистон бу борада асосий номзодлар сифатида тилга олинмоқда.

Таҳлилчилар бу жараён Apple маҳсулотларининг нархига ҳам таъсир қилиши мумкинлигини таъкидлашмоқда.

Компания ҳозирча фойдаланувчилар учун нарх ошиши ҳақида расман маълумот бермаган.

Нодирбек Раззоков

«ЗАМИН.УЗ» муҳаррири