Google компанияси ўзининг янги авлод смартфонлари — Pixel 10 серияси ҳақида қизиқарли янгиликни маълум қилди. Android Authority нашри орқали тарқатилган хабарга кўра, бу гаджетлар батарея ҳолатини кузатувчи махсус функция билан жиҳозланади ва у вақт ўтиши билан аккумуляторнинг максимал қувватини чеклаб боради.
Компания изоҳ беришича, янги тизим батарея саломатлигини назорат қилиб, 200 заряд циклдан бошлаб максимал қувватни пасайтириш жараёнини ишга туширади. Бу жараён аста-секин давом этиб, 1000 циклга етганда энг юқори қувват кўрсаткичи сезиларли равишда қисқариб кетади. Албатта, бу битта зарядда ишлаш муддатини камайтиради, аммо узоқ вақт давомида смартфон батареяси умумий ишлаш даврини узайтиради.
Шу билан бирга, Samsung ва Oppo каби етакчи рақиблар ўз смартфонлари батареяси 1600–2000 циклдан кейин ҳам саломатлигининг 80 фоизини сақлаб қолишини даъво қилмоқда. Google эса бу кўрсаткични 1000 цикл билан чекламоқда. Бу эса фойдаланувчилар орасида тортишувли баҳсларга сабаб бўлмоқда.
Маълумот учун, Google бунга ўхшаш қадамни аввал ҳам қўллаганди — Pixel 9a моделида батареянинг максимал қувватини чеклаш орқали хавфсизлик муаммосини ҳал қилишга ҳаракат қилган. Чунки ўшанда айрим қурилмаларда батарея ёниб кетиш хавфи ҳақидаги хабарлар тарқалган эди.
Хулоса қилиб айтганда, Google'нинг бу янги қарори батарея хавфсизлиги ва узоқ умрли ишлашни таъминлашга қаратилган. Бироқ айни пайтда рақобатчилар кўрсаткичига нисбатан паст бўлган цикл миқдори Pixel 10 серияси атрофида турли баҳс ва саволларни келтириб чиқариши турган гап.
«Замин»ни Telegram’да ўқинг!
