Instagram фото-видео платформаси ўз ижодкорларини қўллаб-қувватлашнинг янги босқичини эълон қилди: сервис 25 нафар энг яхши контент муаллифини махсус мукофот билан тақдирлайди. Танловда мода ва визаждан тортиб спорт ҳамда кўнгилочар контентгача — кенг йўналишларда ижод қиладиган аккаунтлар иштирок этади, деб ёзди The Hollywood Reporter.
Совриндорларга инглиз модельери Грейс Уэлс Боннер томонидан махсус ишланган эксклюзив узук тақдим этилади. Шунингдек, ғолибларнинг профилида аватар ва Stories атрофида “олтин узук”га ўхшаш визуал белги пайдо бўлиб, уларнинг мақоми ва ютуғини ажратиб кўрсатади.
Instagram’нинг айтишича, лауреатлар рўйхати 2026 йилда маълум қилинади. Танлов мезонлари ҳақида қўшимча тафсилотлар кейинроқ баён этилиши кутилса-да, рақамли майдондаги таъсир, оригинал ғоялар ва жамоага қўшилган ҳисса каби омиллар устувор бўлиши тахмин қилинмоқда.
Қисқаси, платформа энг илҳомбахш контент яратувчиларни намоён этиб, уларнинг меҳнатини ҳам моддий, ҳам символик тарзда қадрламоқчи. Ижодкорлар учун янги мотивация, мухлислар учун эса севимли аккаунтларини янада тезроқ таниш имкони!
“Zamin”ни Telegram'да ўқинг!
