Telegram асосчиси Павел Дуров ўз туғилган куни муносабати билан интернет эркинлигига бағишланган мурожаат эълон қилди. Унинг таъкидлашича, бир вақтлар ахборот алмашиш ва фикр эркинлигининг рамзи бўлган интернет ҳозирда тобора кўпроқ назорат воситасига айланиб бормоқда.
«Бизда оталаримиз яратган эркин интернетни сақлаб қолиш учун жуда оз вақт қолди», — деди Дуров ўз баёнотида.
Унинг сўзларига кўра, Германия, Буюк Британия ва Франция каби илгари эркинлик намунаси бўлган давлатлар бугунги кунда “антиутопик чоралар”ни жорий этмоқда. Шу билан бирга, у Россия ҳақида ҳеч қандай фикр билдирмади.
«Бизнинг авлод ўз эркинликларига эга бўлган, аммо уларни сақлаб қололмаган сўнгги авлод сифатида тарихда қолиш хавфи бор. Шунинг учун бугун байрам қилишни истамайман. Менинг вақтим тугаяпти. Бизнинг вақтимиз тугаяпти», — деди у.
Маълумот учун, Павел Дуров ҳозирда Францияда тергов остида. Франция ҳукумати уни расмий сўровларга жавоб бермаганлик ва хакерлик дастурларининг тарқалишига кўмаклашишда айбламоқда.
“Zamin”ни Telegram'да ўқинг!
