Figure Robotics такомиллаштирилган одамсимон роботининг янги авлодини намойиш этди. Янгиланган Figure 03 энди уй юритишда кўмакчи: тозалаш, кир ювиш, идиш-товоқ ювиш, таом тортиш ва ҳатто майда етказиб бериш каби вазифаларни бажара олади.
Роботнинг қўллари тактил сенсорлар билан жиҳозлангани туфайли объектларни “ҳис қилиб”, уларни хавфсиз ушлайди, нозик ёки нотекис буюмлар билан ҳам эҳтиёткор ишлайди. Ҳар бир кафтдаги камералар эса чекланган жойларда ҳам ҳаракатларни реал вақтда тўғрилашга ёрдам беради.
Figure 03’нинг “мияси” — кўриш, тил ва ҳаракатни бирлаштирган Helix сунъий интеллекти. Шу боис у топшириқни тушунади, муҳитни кузатади ва ҳаракатини вазиятга мослаштиради.
Қурилма “мослашувчан” платформада ясалган: уй шароитида уни одамга хос “кийим”да ишлатиш, ишлаб чиқаришда эса бошқа конфигурациядан фойдаланиш мумкин. Янги модел аввалгиларга нисбатан енгилроқ ва ихчам, шунингдек, симсиз қувват олишни қўллаб-қувватлайди.
Ҳозирча Figure 03 роботининг оммавий ишлаб чиқариш санаси маълум қилинмаган.
“Zamin”ни Telegram'да ўқинг!
