Tiiny AI компанияси технология оламида навбатдаги шов-шувли янгилигини тақдим этди. Pocket Lab деб номланган ушбу қурилма дунёдаги энг кичик шахсий сунъий интеллект компьютери сифатида эътироф этилмоқда. Ҳажми атиги 14×8×2,5 сантиметр, оғирлиги эса тахминан 300 грамм бўлган ушбу мини-компьютерни бемалол чўнтакка солиб юриш мумкин.
Ўлчами кичик бўлса-да, имкониятлари катта. Pocket Lab 120 миллиард параметрга эга бўлган йирик сунъий интеллект моделлари билан мустақил ишлай олади. Энг муҳими, бунда интернетга уланиш ёки қўшимча видеокарта талаб этилмайди. Барча ҳисоб-китоблар тўлиқ қурилманинг ўзида амалга оширилади.
Қурилманинг техник жиҳатлари ҳам диққатга сазовор. У 12 ядроли процессор, махсус ишлаб чиқилган AI-чип, 80 гигабайт тезкор хотира ҳамда 1 терабайтли SSD билан жиҳозланган. Энергия сарфи эса оддий компьютерлар даражасида — тахминан 65 ваттни ташкил этади, бу эса уни кундалик иш учун ҳам қулай қилади.
Pocket Lab’да сунъий интеллект моделларини ишга тушириш жуда осон. Llama, Qwen, DeepSeek, Mistral ва Phi каби машҳур AI моделларини бир тугмани босиш орқали ишлатиш мумкин. Эътиборли жиҳати — барча маълумотлар фақат қурилманинг ўзида сақланади, ташқи серверларга узатилмайди.
Янги қурилма илк бор CES 2026 халқаро кўргазмасида намойиш этилиши режалаштирилган. Ҳозирча Pocket Lab’нинг аниқ нархи ва сотувга чиқиш санаси ошкор қилинмаган. Бироқ, ушбу янгилик шахсий сунъий интеллект қурилмалари бозорида янги босқични бошлаб бериши шубҳасиз.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
