22:02 / 02.04.2017

Швейцарияда касалхоналарга қон етказиб беришда дронлардан фойдалана бошланди

Швейцариянинг Лугано шаҳридаги икки касалхона қон етказиб бериш учун дронларни синовдан ўтказишни бошлади. Янги технология йўлларда юз берадиган мураккаб вазиятларни четлаб ўтган ҳолда биоматериални тезкорлик билан етказиб бериш имконини беради. Лойиҳа Swisspost почта хизмати кўмагида яратилди. Бу ҳақда TJournal'га таяниб Дарё хабар берди.

Американинг Matternet компанияси маҳсулоти ҳисобланган дронларга лаборатория контейнери жойлаштирилади. Шундан сўнг касалхона ходимлари дронни мобил дастур ёрдамида ишга туширади. Белгиланган жойда иккинчи касалхона ходими жўнатмани қабул қилиб олади.

Учувчи воситалар ўртасидаги тўқнашувларнинг олдини олиш мақсадида компания авиация соҳасидаги тартибга солувчи органлар билан ҳамкорлик қила бошлади. Дрон биноларни ва парвоз учун ёпиқ ҳудудларни четлаб ўтади.

Қурилма икки килограммгача бўлган юкни 20 километргача бўлган масофага олиб бора олади. Унинг тезлиги соатига 36 километргача етиши мумкин. Инфрақизил датчиклар дронга фавқулодда ҳолатларни аниқлашга ва парашют ёрдамида ерга тушишга имкон беради.

Swisspost’нинг хабар беришича, дронлар дастлаб шаҳарлар ҳудудида тиббий мақсадларда фойдаланилади. Бундан аввал дронлар Руандадаги қишлоқларда дори ва қон етказиб бериш каби вазифаларни бажарган.

The Verge нашрининг ёзишича, дронлар синови 2017 йилнинг март ойи ўрталарида бошланган. Ўша вақтдан буён икки касалхона ўртасида 70 дан ортиқ синов ўтказилди. Хизматни доимий асосда ишга тушириш 2018 йилда ражалаштирилмоқда.