Google компанияси ўзининг янги Gemini Spark деб номланган 24/7 режимида ишловчи агентли ёрдамчисини тақдим этди. Ушбу технология фойдаланувчининг рақамли ҳаётини тартибга солиш, хусусан, электрон почта хабарларини умумлаштириш, шахсий харажатлар жадвалини тузиш ва кўп вақт талаб қиладиган қўлда бажариладиган ишларни автоматлаштириш учун мўлжалланган. Google раҳбари Sundar Pichai таъкидлаганидек, Spark булутли тизимда ишлагани сабабли, фойдаланувчи ўз ноутбугини ёпиб қўйса ҳам, тизим вазифаларни бажаришда давом этаверади. Бу ҳақда Techcrunch.com хабар беради.
Амалиётда Gemini Spark асосан иш жараёнларига йўналтирилган бўлиб, у Gmail, Календар, Докс, Шеетс ва Слидес каби Google экотизимидаги иловалар билан чуқур интеграциялашган. Масалан, у кунлик электрон хатларингиз ва тақвимингизни сканерлаб, энг муҳим учта вазифани саралаб бериши мумкин. Гарчи бу функциялар ҳамма учун ҳам зарурий туюлмаса-да, тизимнинг доимий фаоллиги уни ОпенКлав каби рақобатчилардан ажратиб туради.
Gemini Spark имкониятларини реал ҳаётий вазиятларда синаб кўриш мақсадида унга харидлар бўйича топшириқ берилди. Тизим маҳаллий дўконлардаги ҳафталик чегирмалар ва купонларни таҳлил қилиб, қайси маҳсулотларни сотиб олиш фойдалироқ эканлигини аниқлаб берди. Ҳатто онлайн буюртма беришда бир нечта промо-кодларни бирлаштириш орқали қандай қилиб кўпроқ маблағ тежаш мумкинлиги бўйича ҳам аниқ тавсиялар берди.
Хулоса қилиб айтганда, Gemini Spark ҳозирча алоҳида бренд даражасидаги инқилобий янгилик бўлмаса-да, Google иловаларидан фаол фойдаланувчилар учун жуда қулай воситадир. У кундалик майда юмушларни ўз зиммасига олиб, фойдаланувчининг вақтини тежашга хизмат қилади. Бироқ, унинг барча имкониятларидан фойдаланиш учун инсон ўз ҳаётини рақамли форматда, яни Google тақвими ва бошқа сервислар орқали режалаштиришга одатланган бўлиши лозим.
“Zamin”ни Telegram'да ўқинг!
