Нотта компаниясига тегишли "SpeakOn" бренди iPhone фойдаланувчилари учун мўлжалланган махсус диктант қурилмасини тақдим этди. MagSafe технологияси ёрдамида смартфоннинг орқа қисмига ёпишадиган ушбу гаджет 129 доллар нархда баҳоланмоқда. Бу ҳақда Techcrunch.com хабар беради.
Қурилманинг асосий вазифаси овозли нутқни матнга ўгириш ва турли иловаларда тезкор фойдаланишни таъминлашдан иборат.
Вазни атиги 25 грамм бўлган қурилма ўзининг микрофонига эга бўлиб, смартфон микрофонидан мустақил ишлайди. Фойдаланувчи тугмани босиб турган ҳолда гапириши кифоя, шунда махсус клавиатура иловаси нутқни автоматик равишда матнга айлантиради.
Тизим нутқдаги ортиқча сўзларни филтрлайди ва матнни рўйхат кўринишида шакллантира олади.
Синовлар давомида қурилманинг микрофон сифати ва дастурий чекловлари борасида камчиликлар аниқланди. Хусусан, овозни сифатли ёзиб олиш учун смартфонни юзга яқин тутиш талаб этилади.
Шунингдек, сунъий интеллект асосидаги таҳрирлаш функцияси баъзан сўзларни асоссиз равишда ўзгартириб юбориши кузатилган.
Гаджет 10 соат давомида узлуксиз ишлаш имкониятига эга ва бир соат ичида тўлиқ қувватланади. Қурилма инглиз, испан, француз ва рус тиллари каби бир қанча тилларни қўллаб-қувватлайди.
Ҳозирча фақат iOS платформасида ишлайдиган ушбу технология келажакда Маc компютерлари билан ҳам мослашиши кутилмоқда.
“Zamin”ни Telegram'да ўқинг!
