Россия Рақамли ривожланиш вазирлиги мобил интернет чекланган вақтда фойдаланиш мумкин бўлган веб-ресурсларнинг «оқ рўйхати» бўйича янги маълумотларни эълон қилди. Вазирликнинг тушунтиришича, ушбу механизм техник жиҳатдан чекланган бўлиб, унга жуда кўп миқдордаги сервис ва сайтларни киритишнинг имкони йўқ. Бу ҳақда Ixbt.com хабар беради.
Ҳужжатга кўра, бирор бир сервис ушбу рўйхатдан жой олиши учун Россия Федерацияси федерал ижроия ҳокимияти органининг махсус илтимосномаси талаб этилади. Бунда давлат органи сўралаётган платформанинг ижтимоий аҳамиятга эга эканлигини расман тасдиқлаши шарт бўлади.
Илгари бундай техник чекловлар мавжудлиги ҳақида очиқ маълумот берилмаган эди.
«Оқ рўйхатлар» тизими 2025 йилнинг кузида жорий этилган бўлиб, у интернет узилган ҳолатларда ҳам муҳим хизматларнинг ишлашини таъминлашга хизмат қилади. 2026 йилнинг апрель ойида рўйхатга қон таркибидаги шакарни масофадан назорат қилиш сервислари, кўнгиллилар ташкилотлари, тиббиёт, транспорт ва давлат платформалари қўшилди.
Ҳозирги вақтда ушбу имтиёзли рўйхатдан «LizaAlert», «Рувики», «Ростех», «Росатом» каби ташкилотлар, шунингдек, «Газпромбанк» сервислари, етказиб бериш хизматлари ва қатор оммавий ахборот воситалари жой олган. Бироқ жойлар сони чеклангани сабабли, барча талабгорлар ҳам рўйхатга киритилмаслиги маълум қилинди.
“Zamin”ни Telegram'да ўқинг!
