"Apple" компаниясининг iPhone 17 линияси бренд тарихидаги энг оммабоп смартфонларга айланди. Бу ҳақда компания молия директори Кеван Парех "Финанcиал Тимес" нашрига берган интервьюсида маълум қилди. Бу ҳақда Ixbt.com хабар беради.
Кеван Парех ва бош директор Тим Кук 2026 йилнинг иккинчи чорагидаги юқори молиявий натижаларни айнан iPhone савдолари билан изоҳлади. Ўтган чоракда компания 111,2 миллиард доллар даромад ва 29,6 миллиард доллар соф фойда кўрганини эълон қилди.
Тим Кукнинг таъкидлашича, янги қурилмаларга бўлган талаб жуда юқори, бироқ таклиф чекланган. Ҳозирги вақтда таъминот занжирида керакли бутловчи қисмларни етарли миқдорда олиш бўйича қийинчиликлар кузатилмоқда.
Смартфонлар савдоси "TSMC" томонидан ишлаб чиқариладиган A19 ва A19 Pro чиплари етишмовчилиги туфайли секинлашган. Бунга "TSMC" корхонасининг сунъий интеллект чипларини ҳам ишлаб чиқараётгани сабаб бўлмоқда.
Шунингдек, хотира чиплари нархининг ошиши кутилмоқда. Тим Кук 2026 йилнинг иккинчи чорагида хотира харажатлари сезиларли даражада ўсишини таъкидлади.
Бу ҳолат сентябрь ойида тақдим этилиши кутилаётган iPhone 18 линиясига ҳам таъсир қилиши мумкин.
“Zamin”ни Telegram'да ўқинг!
