Хитой ўзининг "Тянгун" орбитал станциясини ривожлантиришнинг янги босқичига тайёргарлик кўрмоқда. Яқин йилларда станциянинг ҳозирги Т-симон шакли хочсимон кўринишга, сўнгра олтита модулдан иборат тузилмага кенгайтирилиши мумкин. Бу ҳақда Ixbt.com хабар беради.
Бу "Тянгун"ни илмий тажрибалар ва халқаро ҳамкорлик учун мўлжалланган йирик орбитал лабораторияга айлантиради.
Станцияни кенгайтириш "Тянхе" марказий тугунига кўп функцияли модул қўшишдан бошланади. Ушбу тўртинчи модул очиқ космосга чиқиш учун махсус шлюзга эга бўлади.
Келгусида бу умумий массаси қарийб 180 тонна бўлган тўлиқ олти модулли станция яратилишига олиб келиши мумкин.
Хитой станцияни ривожлантириш учун ракета ва техник инфратузилмани модернизация қилмоқда. Хусусан, "Чанчжэн-5Б" ракетасининг кучайтирилган версияси ва янгиланган роботлаштирилган манипуляторлар устида иш олиб борилмоқда.
Агар режалар амалга ошса, "Тянгун" яна 15 йил атрофида ишлаши мумкин. Халқаро космик станция орбитадан чиқарилгач, у пастки Ер орбитасида ягона йирик ва доимий фаолият юритувчи станция бўлиб қолиши кутилмоқда.
“Zamin”ни Telegram'да ўқинг!
