Гизмочина хабарига кўра, Ҳонор компанияси аккумулятор сиғими 10 000 мА·соат ва ундан юқори бўлган бир нечта янги смартфонлар устида иш олиб бормоқда. Ҳозирги кунда бренд аллақачон шундай сиғимга эга учта моделни чиқарган бўлиб, янги қурилмалар билан бу кўрсаткич еттитага етади. Ҳозирча ҳеч бир бошқа смартфон ишлаб чиқарувчи бундай натижа билан мақтана олмайди. Бу ҳақда Ixbt.com хабар беради.
Янги лойиҳалар орасида айниқса иккита қурилма диққатга сазовор. Улардан бири 12 000 мА·соатлик аккумулятор билан жиҳозланиши кутилмоқда, бу эса оммавий ишлаб чиқариладиган смартфонлар орасида энг юқори кўрсаткичлардан бири бўлади. Иккинчи модел эса икки элементли (дуал-селл) архитектурага эга 10 000 мА·соатлик батареядан фойдаланади.
Ушбу конструкция қурилманинг қизиб кетишининг олдини олиб, совутиш тизимини яхшилаш ва қувватланиш жараёнини тезлаштириш имконини беради. Янги технология ёрдамида ҳатто бундай катта сиғимли батареяларни ҳам 120 Вт қувват билан тезкор қувватлаш мумкин бўлади.
Мутахассисларнинг фикрича, мазкур қурилмалар келажакда Ҳонор Х80, Повер 3 ва Вин 2 туркумларига кириши мумкин. Бироқ компания ҳозирча ушбу маълумотларни расман тасдиқлагани йўқ.
“Zamin”ни Telegram'да ўқинг!
