Жанубий Кореяда сунъий интеллект (AI) технологиялари ривожи ортидан келаётган қўшимча солиқ тушумларини фуқароларга «дивиденд» сифатида тақсимлаш масаласи муҳокама қилинмоқда. Ушбу ташаббус билан президентнинг сиёсий штаб раҳбари Ким Ён-бом чиқди. Бу ҳақда Ixbt.com хабар беради.
Ким Ён-бомнинг таъкидлашича, ҳукумат AI соҳасидан катта фойда кўраётган компаниялардан олинадиган қўшимча солиқлар ҳисобига аҳолини қўллаб-қувватлаши мумкин. У бизнес учун янги солиқлар жорий этилмаслигини, балки мавжуд бюджет маблағларини қайта тақсимлаш назарда тутилаётганини алоҳида қайд этди.
Ушбу баёнот фонд бозорида қисқа муддатли саросимага сабаб бўлди. Хусусан, Samsung Электроникс ва СК Ҳйних акциялари 2–2,5 фоизга арзонлашди. Бироқ, бу шахсий ташаббус экани ва ҳукумат даражасида расмий қарор қабул қилинмагани маълум бўлгач, вазият барқарорлашди.
Таҳлилчиларнинг фикрича, AI инфратузилмасига бўлган талаб ортиши Samsung ва СК Ҳйних компанияларига рекорд даражадаги фойда келтириши кутилмоқда. Давлат эса ушбу маблағларни таълим, ёшлар ва тадбиркорликни қўллаб-қувватлаш ҳамда пенсия дастурларини молиялаштириш учун махсус жамғармага йўналтиришни таклиф қилмоқда.
Мазкур ёндашув AI иқтисодиётига янгича қарашни англатади. Агар сунъий интеллект йирик корпорацияларга ўта юқори даромад келтирса, жамият ҳам давлат дастурлари орқали ушбу муваффақиятдан ўз улушини олиши керак, деган ғоя илгари сурилмоқда.
“Zamin”ни Telegram'да ўқинг!
