Сунъий интеллект технологиялари бугунги кунда тиббиётдан тортиб мижозларни қўллаб-қувватлаш хизматларигача бўлган барча соҳаларга кириб бормоқда, бироқ код ёзиш жараёнидаги самарадорлик ҳали ҳам етакчи ўринда қолмоқда. Канаданинг юридик фирма бошқаруви дастурий таъминотини ишлаб чиқарувчи Клио компанияси асосчиси ва бош директори Жек Ньютон юридик технологиялар (легал теч) LLM даврининг навбатдаги йирик ғолиби бўлишига ишончи комил. Бу ҳақда Techcrunch.com хабар беради.
Клио компанияси 2023-йилда ўз маҳсулотларига сунъий интеллектни интеграция қилгандан сўнг даромадлари кескин ўсганини қайд этди. Компания 2024-йил ўрталарида 200 миллион долларлик йиллик такрорланувчи даромад (АРР) кўрсаткичидан ошиб ўтди ва яқинда бу рақам 500 миллион долларга етганини эълон қилди. Ньютоннинг таъкидлашича, юридик соҳа LLM моделлари учун жуда бой маълумотлар базасига эга, чунки юридик фирмалар миллионлаб шартномалар ва ҳужжатларга эгалик қилади.
Ушбу ўсиш тенденцияси фақат Клио билан чекланиб қолмаяпти. Юридик фирмалар учун сунъий интеллект хизматларини тақдим этувчи Ҳарвей компанияси 2025-йил охирига келиб 190 миллион долларлик АРР кўрсаткичига эришди. Шунингдек, унинг асосий рақобатчиси Легора платформаси ишга туширилганидан атиги 18 ой ўтиб 100 миллион долларлик даромад маррасини забт этди.
Юридик технологиялар бозоридаги бу ўзгаришлар Anthropic компаниясининг ҳам эътиборидан четда қолмади. Яқинда Anthropic юридик соҳа учун махсус Claude фор Легал функциялар тўпламини тақдим этди. Бу янгилик юридик ҳужжатларни таҳлил қилиш ва лойиҳалаштириш каби кўп вақт талаб қиладиган жараёнларни автоматлаштиришда янги босқични бошлаб бериши кутилмоқда.
“Zamin”ни Telegram'да ўқинг!
