Xiaomi Груп президенти Лу Вейбинг компания нима учун iPhone Air услубидаги ўта юпқа корпусли смартфонни бозорга чиқармаганини тушунтириб берди. Юқори мартабали менежернинг сўзларига кўра, Xiaomi ушбу лойиҳа устида жиддий ишлаган ва ҳатто уни оммавий ишлаб чиқариш босқичига қадар олиб борган, бироқ якунда лойиҳани тўхтатишга қарор қилинган. Бу ҳақда Ixbt.com хабар беради.
Рад этишнинг асосий сабаби — техник имкониятлардаги катта муросалар бўлди. Лу Вейбингнинг таъкидлашича, бундай юпқа ва ихчам корпусда смартфоннинг автономлиги ҳамда унумдорлигини сақлаб қолиш имконсиз эди. Натижада, қурилма Xiaomi компаниясининг юқори стандартларига жавоб бермаслиги аниқ бўлди.
Компания раҳбари янги модел нима учун "Plus" эмас, балки Xiaomi 17 Max деб номланганига ҳам аниқлик киритди. Унинг сўзларига кўра, "Plus" белгиси одатда экран ўлчамининг катталашишини англатади. "Max" эса шунчаки катта дисплей эмас, балки камера, унумдорлик ва батарея қуввати каби бир қанча йўналишларда амалга оширилган жиддий янгиланишларни ифодалайди.
Xiaomi 17 Max смартфони шу ойда тақдим этилиши кутилмоқда. Инсайдерларнинг хабар беришича, қурилма 200 мегапикселли Леика камераси, Snapdragon Элите 8 Ген 5 процессори ва 8000 мА/соат сиғимли аккумулятор билан жиҳозланади.
“Zamin”ни Telegram'да ўқинг!
