Ребио Груп таҳлилларига кўра, Шимолий Америкада оптик толали кабелларга бўлган талаб жорий йилда 22–25 фоизга ошиши кутилмоқда, таклиф эса атиги 12–19 фоизга ўсиши прогноз қилинмоқда. Йирик харидорлар учун маҳсулотни етказиб бериш муддати 20 ҳафтадан ошиб кетган бўлса, кичик харидорлар учун бу муддат бир йилгача чўзилиши мумкин. Бу ҳақда Ixbt.com хабар беради.
Технология гигантлари ушбу муаммони кўп йиллик шартномалар тузиш орқали ҳал қилмоқда. Январ ойида Meta дунёдаги энг йирик оптик кабел ишлаб чиқарувчиси бўлган Корнинг Инкорпоратед компанияси билан 6 миллиард долларлик етказиб бериш шартномасини имзолади. Корнинг ҳозирда жаҳон бозорининг 10,4 фоизини эгаллаб турибди.
Шунингдек, NVIDIA компанияси Шимолий Каролина ва Техасда учта янги оптик толали кабел заводини қуриш учун Корнинг компаниясига 300 миллион доллар сармоя киритди. Ушбу инвестициялар NVIDIA компаниясига АҚШ бозорида ишлаб чиқариш қувватларининг салмоқли қисмини назорат қилиш имконини беради.
Старвиев тадқиқот компанияси прогнозларига кўра, оптик толали кабеллар жаҳон бозори 2025–2031-йиллар оралиғида ўртача 4,1 фоизга ўсиб, 2031-йилга келиб 12,6 миллиард долларлик ҳажмга етади. Аввалроқ Хитойда махсус оптик толали маҳсулотлар нархи бир йил ичида ўн баробарга ошгани ҳақида хабар берилган эди.
“Zamin”ни Telegram'да ўқинг!
