Хитойнинг сунъий интеллект соҳасидаги етакчи стартапларидан бири бўлган DeepSeek ўзининг энг илғор В4-Pro модели учун нархларни доимий равишда 75 фоизга пасайтирди. Эндиликда ушбу моделдан фойдаланиш харажатлари дастлабки нархнинг чорак қисмини ташкил этади. Компания ушбу қарорни юқори унумдорликка эга тизимлардаги ҳисоблаш қувватлари билан боғлиқ чекловлар юmsҳатилгани билан изоҳлади. Бу ҳақда Ixbt.com хабар беради.
DeepSeek томонидан берилган расмий баёнотга кўра, В4-Pro API хизмати учун нархлар фойдаланиш турига қараб бир миллион токен учун 0,025–6 юангача (тахминан 0,0035 доллардан 0,83 долларгача) туширилди. Аввалроқ ушбу кўрсаткич 0,1–24 юан оралиғида эди. Маълумот учун, токен сунъий интеллект модели томонидан қайта ишланадиган матн бирлигидир.
Таҳлилчиларнинг фикрича, нархларнинг бундай кескин пасайиши Huawei Ассенд 950 чиплари етказиб бериш ҳажмининг ортиши билан боғлиқ бўлиши мумкин. АҚШ томонидан NVIDIA маҳсулотларига қўйилган экспорт чекловлари фонида Huawei чиплари Хитой бозорида асосий муқобилга айланди. DeepSeek аввалроқ Huawei Ассенд 950 супер-тугунларининг оммавий ишга туширилиши нархларни сезиларли даражада пасайтиришга имкон беришини таъкидлаган эди.
Ўтган ойда В4 версияси тақдим этилганда, Pro талқини ҳисоблаш ресурслари танқислиги сабабли оддий Флаш версиясидан 12 баравар қимматроқ бўлиши айтилган эди. Нархларнинг арзонлашиши DeepSeek моделларини ишлаб чиқувчилар ва бизнес вакиллари учун янада ҳамёнбоп қилади ва сунъий интеллект бозоридаги рақобатни кучайтиради.
“Zamin”ни Telegram'да ўқинг!
