2026-йил 25-май куни "Шенжоу-23" бошқариладиган космик кемаси экипажи Хитойнинг "Тиангонг" орбитал станцияси бортига муваффақиятли ўтди. "Тианҳе" асосий модули билан автоматик туташув амалга оширилгач, космонавтлар ўтиш люкларини очиб, станция ичкарисига киришди. Бу ҳақда Ixbt.com хабар беради.
Уч нафар тайконавт — командир Жу Янгжу, Жанг Жиюан ва Ли Жиайинг тизимларни зарурий текширувдан ўтказиб, навбатни қабул қилиш ишларини бошладилар. Улар илмий тажрибалар ўтказиш, станцияга техник хизмат кўрсатиш ва аввалги экипажнинг Ерга қайтишига тайёргарлик кўриш билан шуғулланадилар.
Эслатиб ўтамиз, 24-май куни Жиуқуан космодромидан "Чангженг-2Ф" элтувчи ракетаси муваффақиятли учирилган эди. "Шенжоу-23" Пекин вақти билан соат 17:20 да старт олиб, парвоздан тахминан 3,5 соат ўтгач станция билан автоматик равишда туташди. Парвознинг барча босқичлари штат режимида ўтди.
Ушбу миссия "Шенжоу" дастури доирасидаги 23-бошқариладиган парвоз ҳисобланади. Хитой 2022-йилдан буён доимий режимда ишлаётган "Тиангонг" орбитал станциясини фаол ривожлантиришда давом этмоқда. Аввалроқ кема мавжуд технологиялар асосида кўп томонлама техник модернизациядан ўтгани хабар қилинган эди.
Ишлаб чиқувчилар қайтувчи капсуланинг асбоб-ускуналар тизимини янгилаб, инсон-машина интерфейсини оптималлаштиришган. Шунингдек, асбоблар панели ихчамлаштирилиши ҳисобига фойдали юк учун кўпроқ жой бўшатилган. Тайконавтлар хавфсизлигини таъминлаш мақсадида кема иллюминаторлари ҳам мустаҳкамланиб, такомиллаштирилган.
“Zamin”ни Telegram'да ўқинг!
