АҚШнинг Anthropic компанияси бозор қиймати бўйича сунъий интеллект стартаплари орасида биринчи ўринга чиқиб олди ва унинг капитализацияси қарийб 965 миллиард долларга етди. Ушбу ўсиш 65 миллиард долларлик инвестицияларнинг жалб қилиниши билан боғлиқ бўлиб, бу компаниянинг сунъий интеллект соҳасидаги рақобатдош позицияларини кескин мустаҳкамлади. Бу ҳақда Ixbt.com хабар беради.
Натижада Anthropic ўзининг асосий рақобатчиси бўлган OpenAI компаниясини ортда қолдирди. Маълумотларга кўра, ҳозирда OpenAI қиймати тахминан 730 миллиард долларни ташкил этмоқда. Anthropic 2021-йилда OpenAI собиқ ходимлари томонидан ташкил этилган бўлиб, у қисқа вақт ичида "этик сунъий интеллект" ва хавфсизлик назоратига урғу берган ҳолда бозорнинг асосий иштирокчисига айланди.
Компаниянинг илк чат-боти бўлган Claude 2023-йилда тақдим этилган ва унинг маҳсулотлар линиясининг асосига айланган эди. Ўшандан бери Anthropic нейротармоқларни хавфсиз ва бошқариладиган тарзда қўллашга эътибор қаратиб, ўзининг сунъий интеллект тизимларини фаол равишда кенгайтириб келмоқда.
Шу ҳафтада SpaceX бош директори Elon Musk ИПО жараёнига тайёрланаётган Anthropic компанияси ўз моделларини ўқитиш учун Колоссус маълумотлар маркази кластерларини ижарага олишга рози бўлганини маълум қилди. Дастлабки келишув олти ойга мўлжалланган бўлса-да, Elon Musk бу муддат бир неча йилга узайтирилиши мумкинлигини таъкидлади.
Аввалроқ SpaceX ва Anthropic ўртасида Теннесси штатидаги Мемфис шаҳрида жойлашган Колоссус ва Колоссус ИИ кластерларининг ҳисоблаш қувватларидан фойдаланиш бўйича шартнома имзоланган эди. Келишувга кўра, Anthropic 2029-йилнинг май ойига қадар ҳар ой 1,25 миллиард доллар миқдорида тўлов амалга ошириши кўзда тутилган.
“Zamin”ни Telegram'да ўқинг!
