Япониялик физиклар рубидийнинг якка тартибдаги атомларидан квант микроскопи асоси сифатида фойдаланиш имконини берувчи янги визуализация усулини ишлаб чиқдилар. Япония Миллий табиий фанлар институтлари маълумотларига кўра, “атом камераси” деб номланган ушбу қурилма анъанавий оптик асбобларга қараганда анча юқори аниқликдаги тасвирларни олишга қодир. Бу ҳақда Ixbt.com хабар беради.
Технология асосида деярли мутлақ нол даражагача совитилган ва лазерли оптик тузоқда ушлаб турилган ишқорий металлнинг битта атоми ётади. Бундай атомни квант компьютерлари ва нанооптик қурилмалар ёнига уларнинг ишига халақит бермасдан жойлаштириш мумкин. У ўрганилаётган объектдан чиқадиган ёруғлик билан ўзаро таъсирга киришганда, унинг ҳолати ва энергетик даражаси ўзгаради, бу эса фотонларнинг характеристикалари, жумладан, интенсивлик ва қутбланишни аниқ ўлчаш имконини беради.
Ўтказилган тажрибалар шуни кўрсатдики, рубидий атоми лазер нури порлашидаги ўзгаришларни тахминан 100 нанометрли фазовий аниқликда кузатиш имконини беради. Бу кўрсаткич оддий оптик микроскопия имкониятларидан сезиларли даражада юқоридир.
Истиқболда ушбу ишланма янада мукаммалроқ квант компьютерлари, алоқа тизимлари, сенсорлар ва нанооптика соҳасидаги тадқиқотлар учун янги воситаларни яратишда муҳим рол ўйнаши кутилмоқда.
“Zamin”ни Telegram'да ўқинг!
