Лаванда ёғи қадимдан инсон саломатлиги ва гўзаллиги учун ишлатиб келинадиган энг машҳур эфир мойларидан бири ҳисобланади. Унинг шифобахш хусусиятлари нафақат ароматерапияда, балки тери муаммоларини бартараф этиш, уйқуни тартибга солиш, бош оғриқларини енгиллаштириш, соч саломатлигини мустаҳкамлаш ва руҳий ҳолатни яхшилашда ҳам кенг қўлланилади.
Мутахассисларнинг таъкидлашича, лаванда ёғининг антимикроб ва антибактериал хусусиятлари уни псориаз (тошбақа касаллиги), акне (ҳуснбузар), аллергия ва бошқа кўплаб тери муаммоларига қарши самарали воситага айлантиради. Агар терида акне пайдо бўлса, бир томчи лаванда ёғини бевосита ушбу жойга суртиш мумкин. Шунингдек, уни кокос ёғи билан аралаштириб ишлатиш акнени олдини олишда ёрдам беради.
Лаванда ёғининг яна бир муҳим жиҳати — у теридаги ажинларни камайтиради ва янги доғларнинг ҳосил бўлишини секинлаштиради. Унинг таркибидаги антиоксидантлар терига зарар етказувчи эркин радикалларга қарши курашиб, қариш жараёнини орқага суришда ёрдамчи бўлади. Шунингдек, терининг эластиклигини сақлаб, уни ёш ва соғлом кўринишда ушлаб туради.
Шифобахш хусусиятларидан бири сифатида лаванда ёғидаги бета-кариофиллин моддаси теридаги яраларни тезроқ битишига кўмаклашади. Бундан фойдаланиш учун пахтага бир неча томчи лаванда ёғини томизиб, яра устига енгилгина суртиш кифоя.
Унинг яна бир ноёб хусусияти — тинчлантирувчи таъсири. Лаванда ёғи хидли таркиби орқали нерв тизимини барқарорлаштириш, стрессни камайтириш ва уйқуни тўғри йўлга қўйишда ёрдам беради. Шу билан бирга, у хашаротлар чақишига қарши самарали восита ҳисобланади. Лаванда ёғини терига суртилса, чивин ва бошқа майда ҳашаротлардан ҳимоя қилади, уларни узоқлаштиради. Агар ҳашарот чақса, унинг асаблантирувчи таъсирини йўқотиш ва қичишишни камайтиришда ҳам ёрдам беради.
«Замин»ни Telegram’да ўқинг!
