Нок соғлом овқатланиш рамзи сифатида танилган бўлса-да, бу ширали меванинг ҳам ўзига хос зарарли жиҳатлари бор. Мутахассислар уни меъёрдан ортиқ истеъмол қилиш соғликка салбий таъсир кўрсатиши мумкинлигини таъкидлашади.
Аввало, нокда фруктоза миқдори юқори. Бу эса ортиқча истеъмол қилинганда ошқозонда газ тўпланишига, шишиш ва ич кетишига сабаб бўлади. Айниқса, ҳазм тизими сезгир бўлган инсонларда бу ҳолат тез-тез учрайди.
Яна бир жиҳат — бўш қоринга нок ейиш тавсия этилмайди. Чунки у ошқозон ширасини кўпайтириб, кўнгил айниши ёки оғриқни келтириб чиқариши мумкин.
Бундан ташқари, нокнинг айрим навларида органик кислоталар кўп бўлиб, улар тиш эмалини емиради ва узоқ муддатда тиш сезувчанлигини оширади.
Шунингдек, мева етилмаган ҳолатда ейилса, ундаги танин моддалари ичак фаолиятини сустлаштириб, ич қотишига олиб келади.
Демак, нокни фойдали мева сифатида истеъмол қилиш мумкин, аммо меъёрда ва тўғри пайтда ейиш соғлом тананинг энг муҳим қоидаларидан биридир.
“Zamin”ни Telegram'да ўқинг!
