2025 yilning birinchi yarmida O‘zbekistonda 73,1 mingta Cobalt avtomobili ishlab chiqarildi, deb Kursiv.uz xabar berdi. Bu o‘tgan yilning shu davriga nisbatan 0,2% ko‘pdir.
Yo‘lovchi avtomobillari orasida ikkinchi o‘rinni Damas egalladi. Olti oyda 46 mingta Damas mikroveni ishlab chiqarildi, bu esa 2024 yilning shu davriga nisbatan 18,1% ga oshgan.
Eng ommabop uchlikka Tracker ham kirdi — yarim yilda 22,8 mingta ushbu model ishlab chiqarildi. Beshlikdan Onix va Kia brendlari ham o‘rin oldi.
Chery avtomobillari ishlab chiqarish hajmi kamaygan. Haval brendidagi avtomobillar ishlab chiqarilishi esa 6,5 baravarga oshib, 3,5 mingtani tashkil etdi. Shuningdek, yarim yillik natijalar bo‘yicha, O‘zbekistonda 7 mingta BYD avtomobili yig‘ildi.
Joriy yilning yanvar–iyun oylarida respublikada jami 185,6 mingta yengil avtomobil ishlab chiqarildi. Ishlab chiqarish hajmi o‘tgan yilning shu davriga nisbatan 4,6% ga ko‘paydi. Shu davrda yuk avtomobillari ishlab chiqarish 29,1% ga oshib, 2 ming donaga yaqin bo‘ldi.
Maxsus yengil avtomobillar ishlab chiqarish 82,4% ga o‘sib, 23,4 mingtaga yetdi.
“Zamin”ni Telegramʻda oʻqing!
