Nissan kompaniyasi yangi, byudjet toifasidagi elektromobil — Leaf B5 modelini taqdim etdi. U yaqinda e’lon qilingan Leaf B7ning soddalashtirilgan versiyasi hisoblanadi, deb yozmoqda ixbt.com sayti.
Kompaniya vakillarining so‘zlariga ko‘ra, yangi modelning maqsadi — Yaponiyada o‘sib borayotgan raqobatga javob qaytarish. Leaf B5 2026-yil fevral oyida ishlab chiqarilishi rejalashtirilgan va 55 kVt·soat sig‘imli akkumulyator bilan jihozlanadi. Uning narxi “yanada kengroq xaridorlar uchun qulay” bo‘lishi kutilmoqda.
Leaf B7 esa Yaponiyada avvalroq — 2025-yil 17-oktabrdan buyurtmaga ochiladi, birinchi yetkazib berishlar 2026-yil yanvarda boshlanadi. U 78 kVt·soat batareya bilan 702 km (WLTC sikli) yurish zaxirasiga ega bo‘ladi. 150 kVt tez quvvatlanish tizimi yordamida 10% dan 80% gacha 35 daqiqada quvvat to‘ldirish mumkin.
Leaf’ning uchinchi avlodi energiya boshqaruvi va batareya sovitish tizimida yangilanishlarga ega. Salonda ikki dona 12,3 dyuymli ekran o‘rnatilgan. Leaf B7 X va G komplektatsiyalari 34 ming – 39 ming dollar oralig‘ida sotiladi.
Kelgusida Leaf B7 Autech (42 ming dollar) va arzonroq Leaf B5 versiyalari ham taqdim etiladi. Leaf B5 uchun aniq narx sotuvlar boshlanishiga yaqin e’lon qilinadi.
“Zamin”ni Telegramʻda oʻqing!
