O‘zbekiston Vazirlar Mahkamasi tomonidan 2025-yil 25-oktyabrda qabul qilingan 676-sonli qarorga ko‘ra, 2026-yil 1-apreldan boshlab avtomatlashtirilgan kamera va radar tizimlari orqali qayd etilgan yo‘l qoidabuzarliklari uchun ham jarima ballari hisoblanadi.
Yangi tartibning asosiy maqsadi — yo‘l harakati xavfsizligini ta’minlash, o‘lim bilan yakunlanadigan holatlarni kamaytirish va intizomni kuchaytirish. Endi jarima ballari nafaqat transport vositasi egasiga, balki uni ishonchnoma, sug‘urta polisi yoki yo‘l varaqasi asosida boshqargan shaxsga ham taalluqli bo‘ladi.
Jarima ballari tizimi 2025-yil 1-iyundan boshlab joriy etilgan edi, ammo dastlab faqat YHXX xodimlari tomonidan tuzilgan bayonnomalar asosida ball qo‘shilgan. Kamera yoki radar orqali aniqlangan qoidabuzarliklar uchun esa ball yozilmas edi. Endilikda texnik imkoniyatlar kengaygani sababli, bu tizim ham to‘liq raqamlashtirilmoqda.
Qarorga binoan, agar haydovchi 12 oy davomida biror qoidani buzmasa, keyingi ilk qoidabuzarligi uchun jarima ball yozilmaydi. Shuningdek, haydovchiga ball yozilganidan so‘ng olti oy davomida yangi qoidabuzarlik sodir etilmasa, tizim avtomatik tarzda undan 2 ballni olib tashlaydi.
Eslatib o‘tamiz, agar haydovchining bir yil ichida jami ballari 12 taga yetsa, ma’lumotlar avtomatik ravishda sudga yuboriladi. Sud qaroriga ko‘ra, bunday haydovchilar 6 oydan 3 yilgacha bo‘lgan muddatda haydovchilik guvohnomasidan mahrum etilishi mumkin.
“Zamin”ni Telegramʻda oʻqing!
