Iqtisodiy tadqiqotlar va islohotlar markazi mamlakatdagi avtomobil harakati va ayirboshlash bozori bo‘yicha navbatdagi tahlilni e’lon qildi. Oktyabr oyida avtotransport vositalari savdosi sezilarli darajada faollashgani, barcha asosiy segmentlarda barqaror o‘sish qayd etilgani ma’lum qilindi.
Markaz xabariga ko‘ra, oktyabr oyida respublika miqyosida jami 112,5 ming avtotransport vositasi sotilgan — bu sentyabr oyiga nisbatan qariyb 11 foiz ko‘p. Ayniqsa, yengil avtomobillar segmentidagi jonlanish umumiy bozordagi ijobiy dinamikani yanada kuchaytirgan.
Yengil avtomobillar bo‘yicha birlamchi va ikkilamchi bozordagi savdolar 12,7 foizga oshib, 95,4 ming donaga yetdi. Hududlar kesimida esa Namangan, Jizzax va Buxoroda eng yuqori o‘sish qayd etilgan — bu viloyatlarda savdolar 20 foizdan ortiq ko‘tarilgan. Shunga qaramay, Samarqand viloyati va Qoraqalpog‘iston Respublikasida faollik biroz pasaygani kuzatilgan.
Birlamchi bozordagi holat
Oktyabr oyi natijasiga ko‘ra, birlamchi bozorda yengil avtomobillar savdosi 19 foizga oshgan. Bu esa oy davomida qo‘shimcha 6 mingdan ziyod yangi avtomobil sotilganini anglatadi. Mahalliy ishlab chiqarilgan yangi avtomobillar bo‘yicha ko‘rsatkich 33,4 ming donaga yetgan — bu sentyabrga nisbatan 22 foiz yuqori.
Shuningdek, yangi xorijiy avtomobillarning sotuvi ham oz bo‘lsa-da o‘sgan. Ushbu segmentda 4,5 ming avtomobil savdoga chiqqan bo‘lib, bu 1,1 foizlik o‘sishni tashkil etadi.
Ikkilamchi bozorda faollik
Oktyabr oyida ikkilamchi bozorda ham ijobiy dinamika kuzatilgan. Yengil avtomobillarning bu segmentdagi savdosi 9 foizga oshib, 57,4 ming donadan oshdi.
Ayniqsa, elektromobillarga bo‘lgan qiziqish sezilarli ravishda o‘sgan: ikkilamchi bozorda elektromobil savdosi 3 ming donadan oshib, oylik 15,2 foizlik o‘sish qayd etilgan. Qizig‘i shundaki, bu ko‘rsatkich o‘tgan yilning shu davriga nisbatan 2,3 barobarga yuqori.
Avto bozordagi bunday faollik, mutaxassislar ta’kidlashicha, aholi xarid qobiliyatining tiklanishi, yangi modellar taqdimoti va kredit-moliyalashtirish imkoniyatlarining kengayishi bilan bog‘liq. Bozordagi dinamika dekabr oyida ham davom etishi kutilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
