BCA elektromobillar uchun yangi taʼmirlash markazini ochdi

Buyuk Britaniyada foydalanilgan elektromobillar va gidrid avtomobillarning qoldiq qiymati keskin tushib ketishining oldini olishga qaratilgan muhim qadam tashlandi. Britaniyaning BCA kompaniyasi Donkaster shahrida eskirgan yoki kafolati tugagan yuqori voltli qismlar, jumladan, akkumulyatorlar va invertorlarni taʼmirlashga ixtisoslashgan sanoatdagi ilk markazni ishga tushirdi. Bu haqda Autocar.co.uk xabar beradi.

ixbt.com maʼlumotiga koʻra, BCA Fleet Solutions tomonidan boshqariladigan mazkur obyekt barcha markadagi elektromobillar uchun diagnostika, taʼmirlash va ehtiyot qismlarini almashtirish xizmatlarini OEM standartlari darajasida taklif etadi. Shuningdek, imkon qadar tejamkorlikni taʼminlash va ekologik barqarorlikni saqlash maqsadida qayta tiklangan yoki foydalanilgan qismlardan ham foydalaniladi.

Bozordagi oʻsish va narxlarning keskin tushishi

Soʻnggi yillarda ikkilamchi elektromobil bozori har chorakda rekord koʻrsatkichlarni qayd etmoqda. Avtomobillar assotsiatsiyasi maʼlumotlariga koʻra, joriy yilning birinchi choragida elektromobillar 86 943 dona sotilib, umumiy ikkilamchi bozorning 4,3 foizini tashkil etdi. Bunga 2020-yil aprel oyidan boshlab joriy etilgan soliq imtiyozlari tufayli xizmat avtomobili sifatida ommalashgan transport vositalarining bozorga oqib kelishi sabab boʻlmoqda.

Biroq, taklifning keskin oshishi fonida ikkilamchi bozor xaridorlari uchun ragʻbatlantiruvchi omillarning kamligi va yangi avtomobillarga beriladigan katta chegirmalar lizing sektoriga oʻz taʼsirini oʻtkazmoqda. Uch yillik shartnoma muddati tugagach, avtomobillar kimoshti savdosiga qoʻyilganda kompaniyalar qoldiq qiymatining keskin pasayishi sababli sezilarli yoʻqotishlarga duch kelmoqda.

Batareya salomatligi va xaridorlar ishonchini oshirish choralari

British Vehicle Rental and Leasing Association (BVRLA) maʼlumotlariga koʻra, uning aʼzolari Buyuk Britaniya yoʻllaridagi ikki million elektromobilning uchdan bir qismidan koʻprogʻini (750 000 ta) boshqaradi. Sanoat uyushmasi xaridorlarga ishonch berish va avtomobillarni sotishni osonlashtirish uchun standartlashtirilgan batareya salomatligi sertifikatlarini joriy etishga chaqirmoqda.

BCA har hafta kimoshti savdosidan 1000 dan ortiq elektromobil oʻtkazib, talabni qoʻllab-quvvatlash uchun bir qator xizmatlarni yoʻlga qoʻydi. Xususan, 2024-yilda kompaniya Aviloo maxsus firmasi bilan hamkorlikda batareya xizmati hisobotini taqdim etishni boshladi. Bu tizim 100 ballik tizimda baholash va A dan E gacha boʻlgan holat darajalarini aniqlash imkonini beradi.

Maʼlumotlarga koʻra, batareya salomatligi toʻgʻrisidagi hisobotlar bilan sotuvga qoʻyilgan 22 000 ta avtomobil bir yil ichida belgilangan narxdan oʻrtacha 1,4 foizga qimmatroq sotilgan. Shu bilan birga, sotuv vaqti 2,3 kunga qisqargan, bu esa dilerlarning ushbu turdagi transport vositalariga boʻlgan ishonchi ortganidan dalolat beradi.