Buyuk Britaniyaning transport xavfsizligi bo'yicha yetakchi tashkiloti rahbari Jeymi Xassall avtomobil haydovchilari o'rtasida qoidalarni buzish holatlarini kamaytirish uchun jarimalar miqdorini oshirishni taklif qildi. Uning so'zlariga ko'ra, yig'ilgan mablag'lar yo'llarda sun'iy intellekt (AI) bilan jihozlangan zamonaviy kameralar tarmog'ini kengaytirishga yo'naltirilishi kerak. Bu haqda Autocar.co.uk xabar beradi.
Yangi avlod AI kameralari yuqori aniqlikdagi tasvir va tezkor protsessorlar yordamida nafaqat tezlikni oshirish, balki rulda telefondan foydalanish yoki xavfsizlik kamarini taqmaslik kabi qoidabuzarliklarni ham aniqlay oladi. Shuningdek, tizim avtomatik ravishda politsiya bazalari orqali avtomobilning soliq va sug'urta holatini tekshirish imkoniyatiga ega.
Statistikaga ko'ra, har yili 200 mingga yaqin haydovchi tezlik rejimini buzgani uchun javobgarlikka tortiladi. Xassall jarimalarni 100 funt sterlingdan 500 funt sterlinggacha oshirish orqali yo'l harakati xavfsizligini kuchaytirish va qoidabuzarlarning qo'lga tushish ehtimolini yuqoriroq qilishni taklif etmoqda.
Mutaxassislar fikricha, haydovchilarning qoidabuzarlik uchun jazolanishiga bo'lgan ishonchini oshirish, jarima miqdorini ko'paytirishdan ko'ra samaraliroq vositadir. Hukumat hozircha jarimalarni oshirish bo'yicha rasmiy qaror qabul qilmagan bo'lsa-da, qoidabuzar haydovchilarga qarshi kurashishning boshqa usullarini ko'rib chiqmoqda.
“Zamin”ni Telegramʻda oʻqing!
