«Bu hech narsani o‘zgartirmaydi». Putin Ukrainaga Amerikaning baravar o‘t ochuvchi tizimlari yetkazib berilishi haqida

^{Foto: Kreml matbuot xizmati}
Rossiya prezidenti Vladimir Putin Amerika Qo‘shma Shtatlari tomonidan Ukrainaga baravar o‘t ochuvchi reaktiv tizimlarining yetkazib berilishi Rossiyaning «maxsus operatsiyasi» uchun «hech narsani o‘zgartirmasligini» aytdi.

Putinning so‘zlariga ko‘ra, shunday turdagi sovet va rus reaktiv tizimlari Ukrainaning o‘zida ham bor, G‘arbning ta’minoti esa jangovar harakatlar paytida yo‘q qilingan qurollar o‘rnini qoplash uchun mo‘ljallangan, xolos. Rossiya prezidentining bayonotiga ko‘ra, xuddi shu holat Rossiya havo mudofaasi go‘yoki «yong‘oqdek chaqayotgan» dronlar bilan ham yuz bermoqda.

Nima uchun Ukraina tomonidan yo‘qotilgan qurollarning o‘rnini to‘ldirish rasmiy maqsadi ushbu mamlakatni «demilitarizatsiya qilish» bo‘lgan operatsiya uchun hech narsani o‘zgartirmasligi haqida Putinning so‘zlarida oydinlik kiritilmagan.

Amerikaning baravar o‘t ochuvchi reaktiv tizimlaridan Rossiya hududiga zarbalar berish uchun foydalanilishi ehtimoli haqida fikr bildirar ekan, Putinning ta’kidlashicha, Ukraina o‘zida ham mavjud bo‘lgan va taxminan 45-70 kilometr masofaga uchadigan raketalar bilan ta’minlanmoqda. Rossiya Federatsiyasi hududiga zarbalar berish uchun «uzoq masofali» raketalarni yetkazib berish va ulardan foydalanish masalasida Putin «hali qurollar yetkazib berilmagan ob’ektlarga zarba berishga» va’da berdi. U qaysi ob’ektlar haqida gapirayotganini ochiqlamadi.

«Umuman olganda, qo‘shimcha qurol yetkazib berish bo‘yicha bu shov-shuvlarning barchasi, menimcha, faqat bitta maqsadni ko‘zlaydi – qurolli mojaroni imkon qadar uzoqqa cho‘zishni», — dedi Putin.

Iyun oyi boshida AQSH prezidenti Jo Bayden Ukrainaga Kiyev anchadan beri so‘rab kelayotgan HIMARS baravar o‘t ochuvchi reaktiv tizimlarni yetkazib berish to‘g‘risidagi buyruqni imzoladi. AQSH hukumati Ukraina Rossiya hududiga zarbalar berish uchun ulardan foydalanmaslikka va’da berganini ma’lum qildi. “Zamin” yangiliklarini “Odnoklassniki”da kuzatib boring