Sardor Umurzoqov Moskvada O‘zbekiston—Rossiya munosabatlarini yanada rivojlantirish masalalarini muhokama qildi

^{Foto: Rossiya TIV matbuot xizmati}
Bosh vazir o‘rinbosari — investitsiyalar va tashqi savdo vaziri Sardor Umurzoqov boshchiligidagi O‘zbekiston hukumati delegatsiyasi 3—4 iyun kunlari tashrif bilan Moskvada bo‘ldi.

Vazirlik matbuot xizmatining xabar berishicha, ikki kunlik tashrif davomida Rossiyaning bir qator rasmiylari, xususan, hukumat raisining o‘rinbosari Aleksey Overchuk, tashqi ishlar vaziri Sergey Lavrov hamda iqtisodiy rivojlanish vaziri Maksim Reshetnikov bilan uchrashuvlar bo‘lib o‘tdi.

Uchrashuvlar chog‘ida ikki tomonlama hamkorlikning bugungi holati, amaldagi kelishuvlarning hayotga joriy etilishi, shuningdek, O‘zbekiston—Rossiya munosabatlarini yanada rivojlantirishning muhim jihatlari muhokama qilindi.

Ikki mamlakat o‘rtasidagi ko‘p qirrali munosabatlarning barcha sohalarida mustahkam aloqalar hamda faol hamkorlik kuzatilayotganligi qayd etildi. Oldin kelishilgan loyihalar, dastur va tashabbuslarni ilgari surish bo‘yicha birgalikdagi ishlarni davom ettirishga o‘zaro sodiqlik bildirildi.

^{Foto: Rossiya TIV matbuot xizmati}
Investitsiyaviy, savdo-iqtisodiy, sanoat, transport va logistika hamkorligi masalalariga alohida e’tibor qaratildi. Ikki davlat o‘rtasidagi o‘zaro manfaatli sheriklikni chuqurlashtirishning amaliy mexanizmlari bo‘yicha mushtarak pozitsiyalar ishlab chiqildi.

Uchrashuv yakunida tomonlarni qiziqtirgan masalalarni hal qilishga qaratilgan navbatdagi tadbirlar bo‘yicha takliflar almashildi hamda o‘zaro munosabatlarning ko‘rib chiqilgan barcha yo‘nalishlariga doir amaliy hamkorlik qilish yo‘llari to‘g‘risida kelishib olindi. “Zamin” yangiliklarini “Twitter”da kuzatib boring