Forbes «Kiyev paradi»da ko‘rsatilgan rus harbiy texnikalarining qiymatini hisoblab chiqdi

Kiyev ko‘chalarida Ukraina-Rossiya urushida yaroqsiz holga kelgan rus harbiy texnikalarining «parad»i bo‘lib o‘tmoqda. Unda urushda zararsizlantirilgan 80ga yaqin harbiy texnikalar qatnashgan. Ekspozitsiya Ukraina Mustaqillik kuni oldidan 20 avgust kuni ochilgan va 26 avgustga qadar davom etadi.

Ukraina mudofaa vaziri Oleksiy Reznikov mazkur ko‘rgazmaga o‘z munosabatini bildirib, «bosqinchilar poytaxtimizda parad o‘tkazmoqchi edi. Mana, ular shu yerda. Faqat yuzlab tonna metallolom ko‘rinishida», deya tvit qoldirgan.

Forbes nashri ushbu «parad»da ishtirok etgan texnikalar qiymatini, ya’ni bu yo‘qotishlar Rossiyaga qanchaga tushganini hisoblab chiqdi.
Unga ko‘ra, mazkur ko‘rgazmadagi harbiy texnikalarning umumiy qiymati 176 million dollarga yetadi. Xususan, «parad»da 7 ta T-90 Vladimir tanklari qatnashgan. Bittasining narxi 4 million dollar.

Yana bir muhim eksponat – «Pansir-S1» o‘ziyurar zenit-raketa va qurol majmuasi. Nashr ushbu texnikaning narxini 14 million dollarga baholagan.

Shuningdek, ko‘rgazmada siz quyidagilarni ko‘rishingiz mumkin:

• 7 ta o‘ziyurar gaubitsa «Msta-S». Bittasining narxi 5,6 million dollarni tashkil qiladi;
  
• 3 ta «Solnsepek» o‘t o‘chirish tizimlari. Bittasining narxi 15 million dollarni tashkil qiladi;
  
• 6 ta «Tayfun» zirhli transport vositalari. Bittasining narxi 3 million dollarni tashkil qiladi;
  
• 10 ta T-80 tanklari. Har birining narxi 1,5 million dollarni tashkil qiladi.

Eslatib o‘tamiz, bu yoqib yuborilgan rus texnikalarining eng katta ko‘rgazmasi, ammo birinchi emas. May oyida ham xuddi shunday ekspozitsiya Kiyevdagi Mixailivska maydonida ochilgan edi.



Rossiya va Ukraina urushi “Zamin” yangiliklarini “Twitter”da kuzatib boring