Zelenskiy: Qrim va bosib olingan boshqa hududlar ham qaytariladi

^{Foto: Ukraina prezidenti matbuot xizmati}
Volodimir Zelenskiy 14 sentyabr kuni Xarkiv oblastining shu kunlarda ukrain qoʻshinlari tomonidan ozod etilgan Izyum shahriga keldi. Ukraina prezidenti rasmiy telegram-kanalida Izyumda olingan suratlar joylashtirildi.

«Odatda biz osmonga qaraganimizda, doim musaffolikni qidiramiz. Bugun esa yuqoriga qarab faqat bir narsani — Ukraina bayrogʻini qidiramiz. Bizning koʻk-sariq rangli bayrogʻimiz bosqindan ozod etilgan Izyumda ham hilpiray boshladi. Ukrainaning har bir shahar va qishlogʻida shunday boʻladi. Faqat bir yoʻnalishda harakatlanamiz — oldinga va gʻalaba sari», — deya suratlarga izoh qoldirgan Zelenskiy.

Ukraina prezidenti Qrim va bosib olingan boshqa hududlar ham Ukraina tarkibiga qaytishiga ishonch bildirdi.

«Biz ishgʻol qilingan hududlardagi, Qrimdagi odamlarga xabar yuborishimiz kerak. Ular bizning odamlarimiz. Bu fojia – sakkiz yil oldingi okkupatsiya. Albatta, bu vaqt koʻplarni, ayniqsa bolalarni oʻzgartirgan. Urush faqat qurol bilan olib borilmaydi. Axborot urushi bilan ham odamlarga hujum qilinadi. Rossiya televidenie bilan, boshqa media vositalari bilan hujum qilmoqda.

Mening nomam shundayki – biz qaytamiz. Ular bu sakkiz yil mobaynida tashviqot televideniesidan nimalarni eshitishgani ahamiyatga ega emas. Biz bilamizki, haqiqat biz tomonda», degan Zelenskiy jurnalistlarga murojaat qilib.

U hozircha bu qachon roʻy berishini aniq ayta olmasligi, chunki buni hozir hech kim bilmasligini qayd etgan. «Ammo biz boramiz, chunki bu bizning erimiz va bizning xalqimiz», deya yakunlagan u.

^{Volodimir Zelenskiyning harbiy libosidagi shevronda shunday yozilgan: Ukraina yoki oʻlim}

Izyum Rossiya qoʻshinlari tomonidan aprel oyi boshida egallab olingandi. Ukraina qurolli kuchlari sentyabr oyi boshida Xarkiv oblastida boshlangan yirik qarshi hujum davomida ushbu shaharni ozod etdi. Izyum rasmiylariga koʻra, shahar uchun janglar va istilo vaqtida tinch aholi vakillaridan kamida ming kishi halok boʻlgan, bundan tashqari oʻz vaqtida tibbiy yordam koʻrsatilmagani tufayli ham koʻplab odamlar jon bergan.

“Zamin” yangiliklarini “Telegram”da kuzatib boring