Istanbuldagi teraktda gumonlangan ayol qoʻlga olindi

^{Foto: AFP}
Turkiya politsiyasi Istanbul shahri markazidagi Istiqlol koʻchasida portlash sodir etishda gumonlangan shaxsni qoʻlga oldi. Bu haqda Turkiya ichki ishlar vaziri Sulaymon Soylu ma'lum qildi.

Vazirning aytishicha, Suriyadagi terrorchilik guruhi portlashga aloqadorlikda gumonlanmoqda - OAV gap Kurdiston ishchi partiyasi haqida ketayotganini taxmin qilgan.

«Tergovda terrorchilik hujumi izlari Suriyaga olib borayotgani va bunda Anqara tomonidan terrorchi sifatida tan olingan guruhlar ishtirok etgani boʻyicha dalillar bor. Bizning ma'lumotlarga koʻra, terakt amalga oshirish buyrugʻi Kobanidan boʻlgan, hujum ijrochisi esa Suriyaning Afrin shahridan kelgan», — deya Soyluning soʻzlarini keltirgan TRT Haber telekanali.

Vazir jami 21 kishi, jumladan bomba oʻrnatgan shaxs qoʻlga olinganini ma'lum qilgan. «Yaqin vaqtlar ichida bizga bu ogʻriqni keltirganlarga biz ortigʻi bilan qaytaramiz», — deya qoʻshimcha qilgan Soylu.

Mamlakat vitse-prezidenti Fuat Oʻqtoy Turkiya hukumati 13 noyabr kuni poytaxtda roʻy bergan portlashni terakt sifatida baholayotganini ma'lum qilgan.

Teraktdan keyin Turkiya hukumati OAVga portlash haqida yangiliklar, voqea joyidan kadrlar, portlash sabablari va gumonlanuvchilar boʻyicha versiyalarni norasmiy manbalarga asoslangan holda tarqatishni taqiqlagan.

«Qabihona hujum»

^{Erdoʻgʻan Balidagi G20 sammitiga uchib ketish oldidan Istanbuldagi Otaturk aeroportida matbuot anjumani uyushtirdi
ANADOLU AGENCY}
Yakshanba kuni Turkiya prezidenti Rajab Toyyib Erdoʻgʻan Istanbul markazidagi Taqsim maydoni hududida olti kishi oʻlimiga va oʻnlab kishilar jarohat olishiga sabab boʻlgan portlashni qoralagandi.

«Davlatimizning tegishli boʻlinmalari ushbu qabihona hujum uchun aybdorlarni qidirish ustida ishlamoqda», dedi Erdoʻgʻan Turkiya telekanallari tomonidan jonli translyatsiya qilingan matbuot anjumanida.

Portlash sayyohlar va mahalliy aholi orasida mashhur boʻlgan Istiqlol koʻchasida sodir etildi. Turkiya vitse-prezidenti Fuat Oʻqtoy hujum ijrochisi ayol kishi ekanini aytgandi.

^{TRT WORLD/ANADOLU AGENCY}
«Hujumni amalga oshirgan shaxs ayol kishi boʻlgan, u bombani portlatgan. Bu terrorchilik akti sodir etilganini koʻrsatadi. Portlash oqibatida olti kishi halok boʻldi. Yaralanganlar soni 81 nafarga etdi», degan u.

«Zafer» partiyasi raisi oʻrinbosari Adem Toshqoya gumonlanuvchi shaxsi haqida ham ma'lumot bergan — u Jiyan Tosun, ammo keyinroq oʻz postini oʻchirib yuborgan.

Soʻnggi ma'lumotlarga koʻra, 81 kishidan 50 kishiga javob berilgan, besh kishi jonlantirish boʻlimida, ularning ikki nafari ogʻir ahvolda qolmoqda.

Oʻqtoyning soʻzlariga koʻra, toʻrt kishi voqea joyida halok boʻlgan, shifoxonada yana ikki kishining joni uzilgan. Turkiya Bosh prokuraturasining 14 nafar tergovchisi, shuningdek sud tibbiyot ekspertlari tergov harakatlariga jalb etilgan.

«Buning ortida kim turgan boʻlmasin, mamlakat ichkarisida yoki dunyoning istalgan burchagida boʻlsa ham biz ularga etib boramiz. Bu odamlar Turkiyaga olib kelinadi, sudga tortiladi va jazolanadi», degan Oʻqtoy.

Terakt uchun javobgarlar haqida Erdoʻgʻan ham matbuot anjumani davomida toʻxtalgan. U ham keskin ohangda aybdorlar jazolanishiga va'da bergan.

«Roʻy bergan hodisa aybdorlari oʻzlariga munosib jazoni olishadi. Terrorizm orqali Turkiyani va turk millatini egallashga boʻlgan urinishlar bugun ham, ertaga ham oʻz maqsadiga erisha olmaydi», degan u.

Istanbul gubernatori Ali Erliqoya portlash mahalliy vaqt bilan soat 16:20 da sodir etilganini ma'lum qilgandi.

Voqea joyiga zudlik bilan politsiya otryadlari, tez yordam mashinalari, oʻt oʻchiruvchilar va boshqa favqulodda xizmatlar etib kelgan.

Ijtimoiy tarmoqlarda tarqalgan videoyozuvlarda odamlar koʻplab restoran va doʻkonlar joylashgan Istiqlol koʻchasi boʻylab chopib ketayotgani aks etgan.

Taqsim maydoni va Istiqlol koʻchasi Istanbulning sayyohlar orasida mashhur va doimiy ravishda odamlar bilan gavjum boʻladigan hududlari sanaladi.

Voqea joyida olingan videoroliklarda portlash oqibatida yaralanib yoki gangib qolgan holda erda oʻtirgan odamlar ham koʻrinadi.

Roliklardan, shuningdek muxbirlarning xabarlaridan bilish mumkinki, portlash ovozi uzoqlardan ham eshitilgan, portlash joyida esa alanga koʻtarilgan.

Tasvirlarda shuningdek portlash roʻy bergan joyda keng oʻra paydo boʻlgani, atrofida bir necha kishi jasadi yotgani koʻrinadi.

Portlash hududidagi barcha odamlar evakuatsiya qilingan, voqea joy oʻrab olingan.

^{Foto: Kemal Aslan / Reuters}
Oʻzbekistonning Istanbuldagi Bosh konsulxonasi Istanbuldagi portlash oqibatida jabrlanganlar orasida Oʻzbekiston fuqarolari mavjudligi haqida ma'lumot yoʻqligini ma'lum qildi.

Keyinroq portlash oqibatida Oʻzbekiston fuqarosi boʻlgan bloger, jamoatchilik faoli Islam Kaparzo ham jabrlangani ma'lum boʻldi. Bu haqda uning oʻzi ijtimoiy tarmoqdagi sahifasida yozib qoldirgan. «Ozgina jarohatlandim, lekin halokatli emas, hayotman», — degan u.

Istiqlol koʻchasida avval ham 2015-2016 yillarda qator teraktlar amalga oshirilgan, bu hujumlarning barchasi uchun javobgarlikni IShID guruhi zimmasiga olgan.

Istanbuldagi soʻnggi yirik terakt 2017 yil 1 yanvariga oʻtar kechasi sodir etilgan, oʻshanda Kalashnikov avtomati bilan qurollangan shaxs Bosfor sohilidagi tungi klubga bostirib kirgan va u erdagi kishilarni oʻqqa tutgandi. Hujum oqibatida 39 kishi halok boʻlib, 69 kishi yaralangandi. “Zamin” yangiliklarini “Telegram”da kuzatib boring