Kreml: Ukrainaning muzokaralar olib borishga imkoniyati ham, xohishi ham yoʻq

^{Foto: Getty Images}
Ukraina prezidenti Vladimir Zelenskiyning Indoneziyadagi G20 sammitida aytgan gaplari Kiev Moskva bilan muzokaralar olib bora olmasligini va buni istamasligini koʻrsatadi, shuning uchun u maxsus operatsiya doirasida oʻz maqsadlariga erishishda davom etadi. Bu haqda Rossiya prezidenti matbuot kotibi Dmitriy Peskov jurnalistlarga ma'lum qildi, deb yozadi «RBK».

«Asosiy narsani qayd etamiz: Ukraina tomonining prezident Zelenskiy tomonidan bir necha marta bayon etilgan pozitsiyasi — ham de-fakto, ham de-yure — shundan guvohlik beradiki, Ukrainada muzokaralar olib borish uchun imkoniyat ham, xohish ham yoʻq. Demak, Rossiyaning maqsadlari maxsus harbiy operatsiyani davom ettirish orqali amalga oshirilaveradi», — dedi Kreml vakili.

Balida boʻlib oʻtayotgan G20 sammitidagi onlayn ishtiroki chogʻida Zelenskiy Ukrainaga yangi va samarali xavfsizlik kafolatlari kerakligini, Minsk kelishuvlariga qaytilmasligini aytdi.

«Biz Rossiyaning keyinchalik terror va global beqarorlikning yangi seriyasini boshlash uchun oʻz kuchlarini qayta toʻplashiga yoʻl qoʻymaymiz. Hech qanday ‘Minsk-3’ kelishuvi boʻlmaydi, chunki kelishuv imzolanishi bilan Rossiya uni buzadi», — dedi Zelenskiy.

Uning soʻzlariga koʻra, Rossiya oʻz qoʻshinlarini Ukraina hududidan zudlik bilan olib chiqib ketishi, dunyo davlatlari esa Rossiya energiya resurslari uchun «narx potologini» kelishib olishi kerak.

Ukraina rahbari Kyiv security compact (Kiev Xavfsizlik shartnomasi) deb nomlangan kelishuv doirasida urushdan keyingi xavfsizlik arxitekturasini yaratishga chaqirdi. Shu bilan birga, u kelishuvlarning Minsk formatiga qaytishni istisno qilmoqda.

G20 sammitida Rossiyaga vakillik qilayotgan tashqi ishlar vaziri Sergey Lavrov Zelenskiyning nutqi oldindan yozib olinganini va 20 daqiqa davom etganini aytdi. Vazirning soʻzlariga koʻra, Ukraina etakchisining bayonotidan shu narsa ma'lum boʻlganki, u Gʻarbning Moskva bilan muzokaralar oʻtkazish zarurligi haqidagi maslahatlariga quloq solmayapti. “Zamin” yangiliklarini “Telegram”da kuzatib boring