07:44 / 23.02.2023

Tramp: Dunyo uchinchi jahon urushi yoqasida turibdi

Dunyo global mojaroga har qachongidan ham yaqinroq va bunga AQShning amaldagi yetakchisi Jo Bayden boshchiligidagi “korruptsion Vashington isteblishmenti” aybdor. Bu haqda AQShning sobiq prezidenti Donald Tramp taʼkidladi.

“Amerikada biz har qanday muhim tashqi siyosat qarorini barbod qilgan korruptsion isteblishmentdan qutulishimiz kerak. Bu boshqa mamlakatlar va urushlar kontekstida yaxshi qarorlar qabul qilmaganini oʻz odamlari aytayotgan prezident Baydenga ham taalluqli”, - deydi Tramp.

Trampning soʻzlariga koʻra, u oʻz prezidentlik davrida Vashington generallari, byurokratlari va AQShni mojaroga qanday tortishni biladigan, ammo undan qanday chiqishni bilmaydigan “diplomatlar”ning “halokatli maslahatlarini” rad etgan. Shu nuqtai nazardan, Tramp davlat kotibi oʻrinbosari Viktoriya Nuland va unga oʻxshagan koʻpchilik “Ukrainani NATO tomon itarish bilan band boʻlganlarni” esladi.

“Bu odamlar uzoq vaqtdan beri qarama-qarshilik qidirmoqda. Endi esa biz uchinchi jahon urushi yoqasida turibmiz”, - dedi Tramp.

Uning soʻzlariga koʻra, global mojaro hech qachon bunchalik yaqin boʻlmagan.