Foto: turkmenportal.com
1 avgustdan boshlab Rossiyada RFga turist sifatida tashrif buyurish, mehmon yoki xizmat safari, ilmiy, madaniy, ijtimoiy-siyosiy, iqtisodiy va sport tadbirlarida qatnashish istagida bo‘lgan xorijliklar uchun yagona elektron vizalar berish tizimi ishga tushirildi.
Rossiyaga bir martalik tashrif buyurish uchun elektron viza 55 mamlakat, jumladan, Germaniya, Avstriya, Italiya, Xitoy, Shimoliy Koreya, Indoneziya, Meksika, Saudiya Arabistoni, Kuvayt, Ummon, Eron fuqarolari uchun mavjud. Vetnam, Kamboja, Myanma davlatlar ro‘yxatiga oxirgi bo‘lib kiritilgan. AQSH va Buyuk Britaniya ro‘yxatda yo‘q.
Elektron viza olish uchun Rossiya Tashqi ishlar vazirligining ixtisoslashtirilgan veb-saytida yoki mobil ilova orqali safar sanasidan kamida to‘rt kun oldin ariza to‘ldirish kerak. Unga arizachining raqamli fotosurati va pasport ma’lumotlari bo‘lgan sahifaning skaneri ilova qilinadi.
Konsullik yig‘imi 52 dollardan, olti yoshgacha bo‘lgan bolalar uchun esa 2 dollardan oshmaydi. Viza chet el fuqarosiga Rossiyada 16 kungacha qolish huquqini beradi. Safar viza rasmiylashtirilgan kundan boshlab 60 kun ichida istalgan sanada amalga oshirilishi mumkin, ammo Rossiyadan chiqish sanasi viza berilgan paytdan boshlab 60 kundan kechikishi mumkin emas.
