Eronda erkak 12 nafar qarindoshini otib o‘ldirdi

17 fevral kuni Eronda 30 yoshli erkak 12 nafar qarindoshini, jumladan, otasi va ukasini otib o‘ldirgan. Bu haqda Eron mahalliy nashrlariga tayanib, CNN xabar berdi.

Manbada aytilishicha, shaxsi oshkor etilmagan erkak Kalashnikov avtomatidan foydalanib, oila a’zolarini o‘ldirgan. Keyinroq jinoyatchining o‘zi ham Kirmon viloyati xavfsizlik kuchlari tomonidan otib o‘ldirilgan.

Xabarda keltirilishicha, olis qishloqlardan birida sodir bo‘lgan bu otishmaga oilaviy nizo sabab bo‘lgan. Nizo tafsilotlari haqida to‘liq ma’lumot taqdim etilmagan.

Eronda oddiy fuqarolar egalik qilishi mumkin bo‘lgan yagona qurol ov miltig‘idir. Jinoyatchi yonidan zamonaviy o‘qotar qurol topilishi esa tegishli organlarni xavotirga solgan. Voqea yuzasidan xavfsizlik xizmatlari tekshiruvni kuchaytirishi ma’lum qilingan. “Zamin”ni Telegramʻda oʻqing!