Jan-Klod Van Dammning mushakdor qizi qanday ko‘rinishga ega?

Uning otasi eng xavfli jangovar filmlarning yulduzi edi, qizi ham o‘zini xafa qilishlariga yo‘l qo‘ymaydi.

Van Varenberg familiyasi keng ommaga biror kimni eslatishi dargumon. Shunday ismli belgiyalik bodibilder va jang san’ati ustasi Gollivudni zabt etishga yo‘l oladi va o‘ziga osonroq talaffuz qilinadigan taxallus oladi — Van Damm. Ammo uning qizi Byanka haqiqiy familiyasida qolishni xohlaydi — u karyerasini tug‘ilganida olgan familiyasi bilan boshlagan. Garchi bugungi kunda u Byanka Van Damm sifatida tanilgan bo‘lsa ham — baribir otasining shon-shuhratidan qochib qutula olmaydi. Ammo Byanka undan o‘zib ketish niyatida.

"Otamdan o‘zib ketish qiyin bo‘lishini tushunaman. U juda katta figura. Lekin men harakat qilaman".

Aftidan 1990 yil 17 oktyabrda Los-Anjelesda tug‘ilgan Byankaning taqdiri mashhur jang san’ati sportchisi yoki hech bo‘lmaganda bodibilder bo‘lishga mo‘ljallangandi.

Uning otasi karate va kikboksing bo‘yicha Yevropa chempioni bo‘lgan, 55 ta jangning 53 tasida g‘alaba qozongan va “Bryussellik mushakdor” laqabini olgan. Onasi Gledis Portuguz ham mashhur bodibilder edi. Byankaning ikkita ukasi bor: kattasi Kristofer va kichigi Nikolay.

Byanka tanani chiniqtirish muhitida ulg‘aygan, u jang san’atini yomon ko‘rishini tan oladi va sport bilan shug‘ullanishni qat’iyan rad etadi. Ota-onasiga qarshi chiqqandek, u bolaligidan zavqlangan balet va figurali uchishni tanlaydi. Garchi onasi unda intizomni rivojlantirish uchun jang san’atiga yuborishga harakat qilgan bo‘lsa-da, u oxir-oqibat qiziga o‘zi qaror qilishiga ruxsat beradi.

O‘smirlik chog‘ida Byanka konkida uchishga qiziqardi — o‘sha paytda oila endigina Vankuverga ko‘chib o‘tgandi. Qiz shu qadar qat’iyatli ediki, u hatto Olimpiya o‘yinlarida qatnashishni xohlaydi, ammo olgan jarohati ulkan rejalarini barbod qiladi.

"Bir muncha vaqt o‘zimni qotib qolgandek his qildim. Butun hayotim konkida uchish bilan bog‘liq edi. Endi uning o‘rniga yangi mashg‘ulot topishim kerak edi".

Keyin Byanka to‘satdan jang san’ati bilan shug‘ullanishga qaror qiladi va otasi bilan mashg‘ulotlarni boshlaydi. Shu bilan birga 2008 yilda u bilan “Maxsus topshiriq” filmida rol o‘ynaydi. Avvaliga u bu faoliyatga ko‘proq hobbi sifatida qaraydi, lekin tez orada kino ham, kurash ham uning asosiy ishiga aylanadi.

Qiz jangovar filmlarda aktrisa sifatida namoyon bo‘ladi, turli loyihalar uchun prodyuser va ssenariy muallifi sifatida ishlaydi va, albatta, muntazam ravishda mashq qilishni unutmaydi. Otasi uslubida “shpagat” ochishi uni mashhur qiladi.

"Men qizlarga jismonan kuchli bo‘lish bilan bir qatorda, nazokatli bo‘lish mumkinligini ko‘rsatmoqchiman. Siz kechki ovqat stolida oyoqlaringizni chiroyli tarzda birlashtirib o‘tirishingiz, shu bilan birga, shilqimlik qilganning orqasiga o‘xshatib tepishingiz ham mumkin. Otam jang san’atini avlodlari uchun mashhur qildi va men bu merosni davom ettirmoqchiman".

Ammo Byankaning mashhur otasi bilan munosabatlari har doim ham yaxshi bo‘lmagan. Uning bolaligida Van Damm nomi bilan bog‘liq bir qator janjallar sodir bo‘ladi: Byankaning onasi bilan shov-shuvli ajrashishdan tortib, mashhur aktyor va sportchining giyohvand moddalarni iste’mol qilgan holda qo‘lga olinishigacha.

"Munosabatlarimiz, albatta, ko‘tarilish va pasayishlarga duch keldi, ammo hozir hammasi yaxshi. Suhbatlashib turamiz, lekin qo‘ng‘iroq qilib, “Dadajon, keling, birga ovqatlanib, gaplashib o‘tiramiz”, deyolmayman. Biz sport zaliga borishni, mashq qilishni afzal ko‘ramiz. Men hech qachon otamning kichkina malikasi bo‘lmaganman".

Mashg‘ulot paytida Byanka 90 yillarning yana bir mashhur aktyori Dolf Lungrenning merosxo‘ri — Ida bilan birga tayyorgarlik ko‘radi. Ikkala qiz ham bir vaqtlar ringda sheriklar bo‘lgan va do‘stona munosabatlarni saqlab qolgan. Ammo Byankaning shaxsiy hayoti haqida ko‘p narsa ma’lum emas. “Zamin” yangiliklarini “Odnoklassniki”da kuzatib boring