AQShning Florida shtatiga kuchli “Milton” toʻfoni va tornado yopirildi (video)

^{Foto: AP}
AQShning Florida shtatiga katta vayronagarchilik va qurbonlar olib kelishi kutilayotgan “Milton” toʻfoni va tornado shtatning gʻarbiy qirgʻoqlariga etib keldi. Bu haqda ABC News xabar berdi.

Floridaga etib borishdan oldin “Milton” bir oz zaiflashgan va eng xavfli beshinchi toifadan dastlab toʻrtinchi, keyin esa uchinchi (shamol tezligi 208 km/soat)ga koʻchirilgan. Biroq ekspertlar, “Milton” hali ham vayronkor va halokatli ekanini aytmoqda. Allaqachon 1,9 milliondan ortiq aholi elektr energiyasiz qolgan, 125 ta uy vayron boʻlgan.


Prezident Jo Bayden ham toʻfon vayronkor boʻlishidan ogohlantirib, aholini evakuatsiya buyruqlariga quloq solishga chaqirgan.

“U aholi punktlarini butunlay vayron qilishi va odamlar oʻlimiga olib kelishi mumkin”, degan AQSh etakchisi.
Amerikaning toʻfonlarni oʻrganish milliy markazi Grinvichda tungi soat ikkilarda “Milton” quruqlikka chiqqandan soʻng bir oz zaiflashgani va ikkinchi toifaga oʻtkazilganini e'lon qildi. Ikkinchi toifada doimiy shamol tezligi 154 dan 177 km/soatgacha boʻladi.

Hozirda “Milton” Florida yarimoroli orqali shimoli-sharqqa, Atlantika okeani tomon harakatlanmoqda. “Zamin” yangiliklarini “Telegram”da kuzatib boring