Qatar Qozogʻistonning harbiy poligonlaridan foydalanadi

^{Foto: Qozogʻiston Mudofaa vazirligi}
Qozogʻiston va Qatar harbiy sohada hamkorlik qiladi. Majlis deputatlari tegishli kelishuvni ratifikatsiya qildi. Bu haqda Tengrinews xabar berdi.

Parlament a'zolari 9 oktyabr kuni Qozogʻiston va Qatar hukumatlari oʻrtasidagi harbiy hamkorlik toʻgʻrisidagi bitimni ratifikatsiya qilish toʻgʻrisidagi qonun loyihasini koʻrib chiqqan.

Muhokama chogʻida deputat Bakitjan Bozorbek hujjat ratifikatsiya qilinganidan keyin Qozogʻiston va Qatar bir-birining harbiy poligonlaridan foydalanishi toʻgʻrimi, degan savol bergan.

“Bitimning 5-moddasiga koʻra, Qatar va Qozogʻiston oʻz harbiy poligonlaridan foydalanish huquqiga ega. Qozogʻistonda harbiy poligonlar koʻp, ammo Qatarda poligon mavjud emas. Faqatgina bitta harbiy baza bor, xolos. Ayting-chi, Qatarda qanday harbiy poligonlar mavjud? Qatar harbiy xizmatchilari haqida gapiradigan boʻlsak... Ularning oʻz qoʻshinlari yoʻq, harbiy xizmatchilarning 80 foizi chet ellik fuqarolardan iborat. Agar ushbu bitim tasdiqlansa, u KXShT kelishuviga qanday ta'sir koʻrsatadi?”, deya soʻragan deputat.

Mudofaa vaziri oʻrinbosari Darxon Axdiev Qozogʻistonda hozircha bunday rejalar yoʻq, deya javob bergan.

“Bizning maqsadimiz ularning poligonidan foydalanish emas, aksincha, Qatar harbiy xizmatchilari bizning poligonimizdan foydalanish imkoniyatiga ega boʻladi. Bunday imkoniyat mavjud va taqdim etiladi. Ikkinchi masalaga kelsak, hech qanday ziddiyat yuzaga kelmaydi. Avval aytib oʻtilganidek, 20 ta mamlakat bilan shunday kelishuv allaqachon imzolangan. Shuning uchun bunday masala koʻtarilmaydi”, dedi vazir oʻrinbosari.

Bozorbek amaldorga hujjatni diqqat bilan oʻrganib chiqishni maslahat bergan. Chunki unda “biz oʻz poligonimizni Qatarga topshiramiz, ular esa oʻz poligonlarini bizga topshiradi” deb koʻrsatilganini aytgan.

“Ha, toʻgʻri. Men shuni aytmoqchimanki, yaqin kelajakda bizning Qatar poligonidan foydalanish maqsadimiz yoʻq, aksincha, biz ularga oʻz poligonimizni beramiz. Poligonni modernizatsiya qilish va tiklash boʻyicha esa mablagʻlar ajratiladi”, deya qoʻshimcha qildi Ahmediev.

Kelishuv doirasida Qozogʻiston va Qatar hukumati quyidagi yoʻnalishlarda hamkorlik olib boradi:
- harbiy ta'lim va harbiy xizmatchilarni tayyorlash;
- harbiy tibbiyot;
- harbiy fan;
- harbiy sohada madaniy va sport tadbirlari;
- tinchlikni saqlash operatsiyalari bilan bogʻliq masalalar yuzasidan maslahatlashuvlar;
- jangovar tayyorgarlik.

Muhokamadan soʻng Majlis deputatlari kelishuvni ratifikatsiya qilish uchun ovoz berdilar. “Zamin” yangiliklarini “Telegram”da kuzatib boring